Kóńil aıtamyz
Uly Otan soǵysy birtindep tarıh qoınaýyna ketip, syn saǵatta Otandy qorǵaý úshin aldyńǵy shepke shyqqan ardagerlerimiz azaıyp barady. Uly Otan soǵysynyń ardageri, Almatynyń qurmetti turǵyny Nazıma Ábdiǵalymqyzy Qusaıynova ómirden ótti. Ol 8 naýryz kúni 99 jasqa tolar edi...
Qaharman apamyzdyń bir ǵasyrǵa taıaǵan ómiri elimizdiń qanshama tarıhı kezeńderin beıneleıdi. Talaı tar jol, taıǵaq keshýlerden ótken apamyzdyń ómiri jastarǵa adal eńbek jolyn kórsetedi.
Nazıma Ábdiǵalymqyzy Aqtóbe oblysy, Qobda aýdany, Novo-Alekseevka aýylynda dúnıege kelgen. 1941 jyldyń maýsym aıynda 10-synypty bitirgen 17 jastaǵy qazaq qyzy Qyzyl Armıa qataryna shaqyrylady. Keshegi mektep túlegi aldymen oblystyq áskerı komısarıatqa túsip, odan keıin eshelonmen Qıyr Shyǵysqa jiberiledi. Onda úsh aı boıy oqý lagerinde daıyndyqtan ótti. Keıinnen bul parashútshi qyz qan maıdanda keńes jaýyngerlerine talaı ret kómekke keldi.
– Nazıma apa 633-shi avıasıalyq batalónǵa oqýǵa jiberiledi. Onda jas qyzdardy jaýdyń artqy shebine jiberý úshin parashútpen sekirýge úıretken. Sodan keıin ol 226-shy avıasıalyq áskerı bólimge jiberilip, onda odan ári qyzmetin jalǵastyrady, – deıdi ardagerdiń týystary.
1945 jyldyń mamyr aıynda qaharman qyzǵa jáne basqa da kóptegen jaýyngerlerge soǵys áli aıaqtalmaǵan edi. Olar taǵy birneshe aı boıy Keńes Odaǵynyń Qıyr Shyǵysynda Japonıany jeńgenge deıin shaıqasty.
Nazıma Ábdiǵalymqyzynyń aıtýynsha, bizdiń elimiz fashısik Germanıany da, Japonıany da keńestik sarbazdar men ofıserlerdiń shydamdylyǵy, batyldyǵy men tabandylyǵynyń arqasynda jeńdi. Ol ózin úlken áskerı mehanızmniń kishkentaı bóligi retinde sanady. Biraq tarıh ol sekildi adamdar bolmaǵanda, úlken jeńistiń de bolmaıtynyn kórsetti.
«Soǵystyń aıaqtalǵanyna qýanýǵa kóp ýaqyt bolmady. Bizdi birden Manchjýrıaǵa, japondyqtar jaýlap alǵan Qytaı provınsıasyna kóshirdi. Men Otanyma 1945 jyldyń qazan aıynda ǵana oraldym», – dep kóz tiri kezinde eske alatyn Nazıma apa.
Batyr qyz shaıqasta kórsetken erligi úshin I jáne II dárejeli «Otan soǵysy» ordenimen jáne 20-dan astam medalmen marapattaldy. Onyń ishinde «Erligi úshin», «Jaýyngerlik erligi úshin» jáne «Japonıany jeńgeni úshin», «Uly Otan soǵysynyń ardageri» marapattary bar.
Maıdannan úıine aman-esen oralǵan Nazıma apa uzaq ýaqyt týǵan jeri Qobdada ómir súrdi. Onda balalar úıinde tárbıeshi, keıin satýshy bolyp jumys istedi. Alaıda, turmysqa shyqqan soń, Almaty oblysyna kóshedi. Jubaıy Dosymhan Qusaıynovpen birge aldymen Shamalǵan stansıasynda turyp, keıin Almatyǵa keledi.
N.Ábdiǵalymqyzy eki ul tárbıelegen. Uldardyń úlkeni kenetten qaıtys boldy, al kishisi Serik Qusaıynov – Qazaqstannyń eńbek sińirgen energetıgi atanyp, uzaq ýaqyt memlekettik qyzmette jumys istedi, QR Parlamenti Májilisiniń depýtaty boldy.
Zeınetkerlikke shyqqanǵa deıin Nazıma apa Qaskeleń aýdanynyń «Drýjba» keńsharynda býhgalter bolyp jumys istegen. Soǵys ardageri qartaıǵanyna qaramastan, týǵan jerine jıi keletin. Aýdan ortalyǵynan birneshe shaqyrym jerde ornalasqan Qobda jolyndaǵy sońǵy aınalymyna onyń esimi berilgen. Qazir bul jer Nazıma aıaldamasy dep atalady.
Nazıma Ábdiǵalymqyzy ár kún úshin taǵdyryna rızashylyǵyn bildirip, ómir boıy adal jumys istedi, dostary men týystaryna qamqorshy boldy.
Uly Otan soǵysynyń ardagerin biletin ár adamnyń júreginde qaıǵy ornaǵany haq. Batyr apamyz Nazym Qusaıynovanyń beınesi otandastarymyzdyń jadynda máńgi ádil, meıirimdi, dana adam bolyp qalady.