Almaty qalasy Qoǵamdyq damý ortalyǵy qyzmetkerleri «Batyl Bol» qazaq tilin úıretý ortalyǵyna baryp, joba negizin qalaýshy Alekseı Skalozýbovpen kezdesý ótkizdi. A.Skalozýbov qazaq tilin qalaı úırengenin jáne klýbty qurý ıdeıasy qaıdan kelgenimen bólisip, jeke qyzyǵýshylyǵyn qoǵamdyq mańyzy bar bastamaǵa aınaldyrý jolyn baıan etti.
Qazaq tilin úıretýdiń erkin ári tegin formaty búgingi qoǵam úshin naǵyz qajet qubylys. «Batyl Bol» til klýby Almatydaǵy júzdegen adamnyń tildik daǵdysyn damytyp, qazaqsha sóıleıtin úlken qaýymdastyq qurýǵa atsalysyp júrgen til ortalyqtarynyń biri. Joba negizin qalaǵan Alekseı Skalozýbovtyń basty maqsaty – qala turǵyndaryna qymbat kýrsqa jazylmaı-aq, yńǵaıly ýaqytta memlekettik tildi meńgerýge múmkindik beretin ashyq alań qurý.
Bul bastama qalaǵa jańa kelgen jas stýdenttiń izdenisinen týǵan. Almatyǵa alǵash kelgende aǵylshyn tilindegi tegin sóılesý klýbtaryna qatysyp, nebári alty aıda erkin sóılep ketken Alekseı Skalozýbov sol tájirıbeni qazaq tiline beıimdeýdi oılaıdy. Osylaısha, 2022 jyldyń 15 sáýirinde alǵashqy qazaqsha sóılesý klýby ashyldy. Klýbqa eki kún ishinde 300-den astam adam tirkelip, joba til úırenýshiler arasynda úlken suranysqa ıe boldy.
Alekseıdiń aıtýynsha, sapaly tildik ortany qalyptastyrýdyń óz sharty bar. Turaqty oqytýshylar, júıeli sabaq jáne maqsatty aýdıtorıa. Qatysýshylardyń basym bóligi – 25 pen 35 jas aralyǵyndaǵy jastar. Degenmen klýbqa oqýshydan zeınetkerge deıingi túrli aýdıtorıa qatysady. Sonymen qatar «Batyl Bol» klýbynda Qazaqstannyń ár óńirinen jınalǵan túrli ult ókilderi bas qosady. Tipti Reseı men AQSH-tan kelgen shetel azamattary da bar. Biraq bárin biriktiretin bir-aq nárse – qazaq tilin úırenýge degen yqylas.
Alekseı til úırenýge eń úlken kedergi – tártip pen turaqtylyqtyń jetispeýi ekenin aıtady:
- Aldymen, tártip. Kóp adam qazaq tilinde erkin sóılegisi keledi, biraq úırengisi kelmeıdi. Qyrkúıek aıynda oqý kýrsyna 150 adam tirkelse, 30 adam sóılesý tobyna qosylǵan. Qazir dısıplınasy myqty 70 adam qaldy. Nátıje tek dısıplına men eńbek bar jerde shyǵady.
Sabaqtardyń mazmuny kúndelikti ómirge negizdelgen: turmystyq jaǵdaıattar, qatysýshylardyń qyzyǵýshylyqtary, jeke tájirıbeler. Mundaı format til úırenýshilerdiń ózderin erkin sezinip, qazaq tilin tabıǵı ortada tez qoldanysqa engizýine jol ashady. Alekseıdiń ózi aptasyna úsh ret klýbqa kelip, qatysýshylarmen birge áńgimelesedi. «Qazaqsha sóılegen, pikir almasqan ózime qyzyqty. Basy-qasynda bolý ózim úshin de úlken qýanysh», – deıdi ol.
Klýbtyń jumysyna KIMEP ýnıversıteti ǵımarat usynyp, Kaz Minerals kompanıasy demeýshilik kórsetip keledi. Qazir «Batyl Bol» aptasyna úsh ret oflaın sabaq ótkizedi. Toptar sany kóbeıgen. Kýrs tek oflaın formatta, sebebi Alekseı tildi tek tabıǵı tildik ortada, tikeleı qarym-qatynas arqyly úırenýge bolady dep sanaıdy.
Búginde klýb Almatydan bólek Astana, Aqtaý jáne Oral qalalarynda da óz fılıaldaryn ashqan.
«Batyl Bol» – erkindik pen yntanyń, azamattyq jaýapkershilik pen tilge degen qurmettiń nátıjesinde týǵan joba. Bastama qazaq tilin úırenýge nıetti ár adam úshin úlken múmkindik beretin alań.
Kezdesý nátıjesinde Qoǵamdyq damý ortalyǵy bazasynda qazaq tilinde tegin sóıleý daǵdylaryn damytý ortalyǵyn ashý týraly kelisim jasaldy.