Úzdik rejıserlik jumysjúldesi fransıalyq Alı Cherrıdiń «Bóget» kartınasyna berildi
Almatyda X Halyqaralyq «Bastaý» stýdenttik jáne debúttik fılmder kınofestıvaliniń jabylý saltanaty bolyp ótti. Festıváldiń qazylar alqasy kınokórsetilimdi qorytyndylap, birneshe nomınasıa boıynsha jeńimpazdardy anyqtady, dep habarlaıdy Almaty-akshamy.kz.
Grýzın rejıseri Georgıı Ovashvılı tóraǵalyq etken halyqaralyq qazylar alqasy Bastau DEBUTS baǵdarlamasynda Bolıvıadan kelgen «Ýtama» kartınasyn úzdik dep tanydy.
Rejıser Alehandro Loaıs Grızıdiń fılmi kechýa ultynyń ókili - qart erli-zaıyptylar jaıynda baıandaıdy.
Týyndy aqpan aıynda áıgili «Sandens» festıvalinde «Álemdik kıno» baǵdarlamasynda Gran-prı jeńip alǵan jáne bıyl Bolıvıadan «Shet tilindegi úzdik fılm» nomınasıasy boıynsha «Oskar» syılyǵyna usynylyp otyr.
Úzdik rejıserlik jumysjúldesi fransıalyq Alı Cherrıdiń «Bóget» kartınasyna berildi, al akterlik nomınasıalarda ındonezıalyq Arsvendı Benıng Svara («Ómirbaıan» fılmi úshin) jáne chılılik Alın Kýppengeım («1976» fılmi úshin) jeńiske jetti.
Chılı, Argentına jáne Katardyń birlesken ónimi sanalatyn sońǵy týyndy («1976») qazylar alqasynyń arnaıy syılyǵyn da utyp aldy.
«Mundaı festıválder jastar úshin, alǵashqy qadamdaryn jasaıtyn stýdentter úshin óte mańyzdy. Bul ómirge degen jáne bizdiń isimizge degen úlken motıvasıa. Ásirese debút úshin óte mańyzdy – al bizder, qazylar alqasy úshin bul úlken jaýapkershilik. Sondyqtan siz júlde aldyńyz ba, joq pa, mańyzdy emes - fılmdi túsirip shyǵarǵanyńyzdyń ózi - jeńis. Sol úshin de kúresýdi toqtaptańyzdar, sonda ǵana jeńiske jetesizder», - dedi sahnadan halyqaralyq qazylar alqasynyń tóraǵasy G. Ovashvılı.
Festıváldiń úzdik qysqametrajdy kórkem fılmi nomınasıasynda qazaqstandyq rejıser Roman Chernıkovtyń «Nına» kartınasy jeńiske jetti.
Sonymen birge BASTAU SHORTS baǵdarlamasynyń qazylar alqasy kelesi nomınasıalar boıynsha jeńimpazdardy anyqtady:
Úzdik anımasıalyq qysqametrajdy fılm - «Tún» Ahmad Saleh, Palestına.
Úzdik qysqametrajdy derekti fılm – «Everesti baǵyndyrý» Bınoda Adhıkarı, Nepal.
Qazylar alqasynyń arnaıy júldesi – Azamat Búkeshovtiń «Jazdyń eń uzaq kúni», Qazaqstan.
Erekshe atalym – «Alıf.Do-re-mı» Alıdjon Djalılov, Tájikstan.
BASTAU DOCS baǵdarlamasynda bas júlde vetnamdyq Ha Le Dımniń «Tuman balalary» atty derekti kartınasyna ózektiligi men beınesi, áleýmettik problemanyń kórinisi jáne óńirimizge jaqyndyǵy úshin berildi.
Sondaı-aq, qazylar alqasy ızraıldik Shır Númannyń «Únsizdik týraly aıtý» kartınasyn urpaqtar arasyndaǵy dıalog múmkindikteri men jeke oqıǵa arqyly halyq tarıhyna degen kózqarastyń maǵynalylyǵy úshin jáne bangladeshtik Hýmaıra Bılkıstiń dástúrli qoǵamdaǵy jeke bostandyq tarıhyn izdegeni úshin «Men anama eshqashan aıtpaıtyn nárse» kartınasyn erekshe atap ótti.
Halyqaralyq stýdenttik qazylar alqasy rejıser Maksım Sevrınovskııdiń «Rotshıld skrıpkasy» atty reseılik kartınaǵa festıváldiń eń úzdik qysqametrajdy fılm ataǵyn berdi.
Sonymen qatar, qyrǵyzstandyq Eldıar Madakım túsirgen «Salvador Dalı» kartınasy da erekshe atalyp ótti.
Bıyl festıválde alǵash ret jumys istegen NETPAK qazylar alqasy ózbek rejıseri Dılshodbek Ýsmonovtyń «Montaj» fılmine óz júldesin usyndy, al «Ortalyq Azıanyń úzdik fılmi» retinde «Bastaý» festıvali Prezıdentiniń arnaıy júldesi rejıser Ernest Ábdijaparovtyń «Áńgimeshi» kartınasyna berildi.
Túrkıadan kelgen rejıser Mert Harmandar «2300 shaqyrym» kartınasy úshin «Kórermen kózaıymy» syılyǵyn aldy.
«Barshańyzǵa úlken alǵysymdy aıtqym keledi. Eń bastysy - kıno merekesi toılandy. Osy bes kúnde biz festıváldan barlyq qıynshylyqtardy, narazylyqtardy, túsinispeýshilikterdi jeńetin kúsh-qýat aldyq», - dep qorytyndylady festıvál prezıdenti S. Ázimov.
Bıyl barlyq Gran-prılerge aqshalaı syılyq berildi.
Esterińizge sala ketsek, H «Bastaýda» 40-tan astam elden 60-qa jýyq kartına básekege tústi. Bul - festıváldiń ózindik geografıalyq rekordy.