2023 jyldyń 12-16 jeltoqsan aralyǵynda Almatyda XI Halyqaralyq «Bastaý» stýdenttik jáne debúttik fılmder kınofestıvali ótedi.
12 jeltoqsanda Abaı atyndaǵy Qazaq ulttyq opera jáne balet teatrynda festıvál saltanatty túrde rejıser Eldar Qaparovtyń «Soǵys tutqyny» tarıhı dramasynyń premerasymen ashylady, dep habarlaıdy Almaty-akshamy.kz.
Fılmdegi oqıǵanyń negizi ekinshi dúnıejúzilik soǵystan keıin keńestik tutqynda bolǵan japondyq jas jigit, ımperatorlyq mekteptiń kýrsanty Ahıko Tesýronyń shynaıy tarıhy men taǵdyry. Lagerde jas japondyq soǵystyń naǵyz batyry, Keńes Armıasynda qyzmet etken jáne Berlınge shabýyl jasaýǵa qatysqan qazaq jaýyngeri Ákejanmen kezdesedi. Ol keıin Japon soǵysyna jiberilip, onda jaraqat alyp, tutqynǵa túsken. Qaıtyp oralǵannan keıin Ákejan "satqyn jáne halyq jaýy" retinde sottalǵan…
Fılmdi prodúserler Borıs Cherdabaev jáne Álıa Ývaljanova bastaǵan halyqaralyq komanda túsrigen. Japondar jaqtan Sano Sındzú jáne Shýıchı Esımýra boldy. Basty keıipkerlerdiń rólderin Syrym Qashqabaev (Qazaqstan) jáne Eısaký Ogasavara (Japonıa) somdady.
Festıvál dástúrli túrde Tanaris Production jáne A-Team kınokompanıalarymen Almaty qalasy ákimdiginiń jáne QR Mádenıet jáne aqparat mınıstrliginiń qoldaýymen uıymdastyrylady. Festıváldiń seriktesteri – T. Júrgenov atyndaǵy Qazaq ulttyq óner akademıasy, «Turan» ýnıversıtetiniń Turan Film Academy joǵary mektebi, AlmaU medıa jáne kıno mektebi jáne Qazaq ulttyq óner ýnıversıteti.
Barlyq kórsetilimder "Arman" kınoortalyǵynda ótedi. Kirý tegin.
Festıvál jańalyqtaryn bastauiff.com saıtynan jáne bizdiń bastauiff – Instagram jáne Facebook paraqshalarymyzdan jiberip almańyz.