11-14 jeltoqsan aralyǵynda Almatyda XII Halyqaralyq «Bastaý» stýdenttik jáne debúttik fılmder kınofestıvali ótedi, dep habarlaıdy aqshamnews.kz.
Ulttyq kınony qoldaý ortalyǵynyń málimdeýinshe, festıváldi dástúrli túrde Almaty qalasy ákimdiginiń qoldaýymen Tanaris Production jáne A Team kınokompanıalary uıymdastyrady.
Festıváldiń saltanatty ashylý rásimi 11 jeltoqsanda «Arman» kınoortalyǵynda ótedi. Shara rejıser Alına Mustafınanyń debúttik tolyqmetrajdy týyndysy - «Onyń ákesine, meniń arǵy atama, onyń arǵy atasyna pirándik» derekti fılmimen ashylady. Kartınanyń álemdik premerasy osy qazan aıynda Ońtústik Koreıadaǵy Pýsan halyqaralyq kınofestıvalinde ótken.
Bıylǵy jyly festıválde BASTAU SHORTS halyqaralyq baıqaý baǵdarlamasy bolady. Onda álemniń túkpir-túkpirinen usynylǵan qysqametrajdy oıyn, derekti jáne anımasıalyq debúttik fılmder kórsetiledi. Bul konkýrsqa qatysý úshin 500-ge jýyq ótinim kelip tústi. Baıqaýdyń barlyq kórsetilimderi «Turan» ýnıversıtetinde ótedi. Kirý tegin.
12-shi «Bastaý» kınofestıvaliniń úzdik fılmderin Reseı kınematografıster odaǵynyń jáne Ózbekstan kıno qaıratkerleri odaǵynyń múshesi, rejıser Rashıd Malıkovtyń tóraǵalyǵymen Halyqaralyq qazylar alqasy aıqyndaıtyn bolady. Qazylar alqasynyń quramyna reseılik kınooperator Borıs Lıtovchenko, qyrǵyzstandyq rejıser, senarıst jáne prodúser Dalmıra Tilepbergen, qazaqstandyq kınosynshy Oraz Kereıbaev jáne otandyq rejıser Oljas Baıalbaev kirdi.
Sondaı-aq, festıvál aıasynda debútti qysqametrajdy oıyn jáne derekti fılmderdiń jobalary bar jas rejıserlerge arnalǵan Almaty Film Lab sheberhanasy ekinshi ret uıymdastyrylmaq. Festıváldiń jabylý saltanaty 14 jeltoqsanda AlmaU-daǵy Atrium Grand Hall-da ótedi. Onda ótken jylǵy Almaty Film Lab pıchınginiń jeńimpazdarynyń úsh qysqametrajdy jumysy kórsetiledi. Sonymen qatar, festıvál baǵdarlamasynda jetekshi kıno mamandarynyń sheberlik synyptary men halyqaralyq kınematografısterdiń qatysýymen dóńgelek ústel bar.
Festıváldiń seriktesteri – «Oraz Ábishev qory» qoǵamdyq qory, «Sháken Aımanov atyndaǵy «Qazaqfılm» ulttyq kınostýdıasy» AQ, Halyqaralyq «Eýrazıa» kınofestıvali, T. Júrgenov atyndaǵy Qazaq ulttyq óner akademıasy, «Turan» ýnıversıtetiniń Turan Film Academy joǵary mektebi, AlmaU medıa jáne kıno mektebi jáne Qara Studios.
Festıvál jańalyqtaryn bastauiff.com saıtynan jáne bizdiń bastauiff – Instagram jáne Facebook paraqshalarynan bilip otyrýǵa bolady.