Bul joly aýa raıynyń qolaısyzdyǵyna baılanysty qalamyzda «Áleýmettik qyzmet kórsetý» úıinde «Halyqtyń áleýmettik osal toptary» tiziminde turǵan azamattarǵa kezek tártibimen páter kilti tabystaldy.
Almaty qalasynyń ákimi Erbolat Dosaevtyń tapsyrmasymen jyl sońyna deıin qalanyń komýnaldyq turǵyn úı qorynan «Halyqtyń áleýmettik osal toptary» (HÁOT) tiziminde turǵan azamattarǵa kezek tártibimen 2000 jaldamaly páter berý josparlanǵan bolatyn. Aǵymdaǵy jyldyń mamyr-maýsym aılarynda Naýryzbaı men Medeý aýdandarynda İ kezeńde HÁOT boıynsha kezekte turǵan jetim balalar men 1080 turǵynǵa páter kilti tapsyrylyp, tirkeýden ótkizildi.
«Alty balanyń anasymyn. Kópbalaly otbasy retinde 2017 jyldan kezekte turǵanmyn. Páterli bolǵanymyzǵa qatty qýanyp turmyz. Bizdi elep-eskerip, baspanaly etken qalalyq ákimdikke, qurylysshylarǵa alǵysymyzdy aıtamyz», – dep qýanyshtan bal-bul janyp turdy qala turǵyny Aıjan Qalıeva.
İİ kezeńde aǵymdaǵy jyldyń qarasha aıynyń basynda Naýryzbaı aýdanyndaǵy «Shuǵyla» yqshamaýdanynda atalǵan toptaǵy, sondaı-aq jetim balalar arasynda kezekte turǵan taǵy 920 adamǵa páter kiltterin tapsyrý jáne páterge kóshirý josparlanýda. 1 qarashada kezekte turǵan 201 adamǵa, 5 qarashada kezekte turǵan 200 adamǵa páter kilti tabystalyp, qonystandy. 7 qarashada Naýryzbaı aýdany «Shuǵyla» yqshamaýdanyndaǵy «Álem Sıtı-3» turǵyn úı kesheninde ornalasqan 5 úıde HÁOT boıynsha kezekte turǵan 175 adamǵa páter kilti tapsyryldy. Sonyń ishinde: 1 bólmeli – 50 páter, 2 bólmeli – 46 páter, 3 bólmeli – 79 páter.
«Búgin Naýryzbaı aýdanynda ornalasqan «Shuǵyla» yqshamaýdanyndaǵy «Álem Sıtı-3» turǵyn úı kesheninde ornalasqan 5 úıden HÁOT boıynsha kezekte turǵan azamattarǵa páter kilti tapsyrylýda. Olardyń sany – 175. Páterler taza, daıyn kúıinde berilýde. Jylý, jaryq qosylǵan. Gaz keler jyldyń sońyna taman (páter ıeleri túgel qonystanǵan shaqta) qosylady. 1, 2, 3 bólmeli páterler bar. Aýmaǵy shamamen alǵanda, bir bólmeli páter – 40 sharshy metr, úsh bólmeli páter – 90 sharshy metrden asady. Kelisim-shartpen kózdelgen jaldaý aqysy bar. Bir bólmeli páterdiń jaldaý aqysy – 10 myń teńge, úsh bólmeli páterdiki 20-25 myń teńge kóleminde bolady. Oǵan qosa, komýnaldyq qyzmet kórsetý tólemderi bar», – dep málimdedi Almaty qalalyq Komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly.
Páter kilti tapsyrylǵan 175 adamnyń ishinde «Halyqtyń áleýmettik osal toptary» sanaty boıynsha bólingen kezekte turǵan 29 jetim bala (2012–2014 jyldar aralyǵynda kezekte turǵan), 1 jáne 2 toptaǵy 30 múgedek (2012 jyldan 2017 jylǵa deıin kezekte), 29 kópbalaly otbasy (2018-2019 jyldar aralyǵynda kezekte), múmkindigi shekteýli balalardy tárbıelep otyrǵan 16 otbasy (2011–2017 jyldar aralyǵynda kezekte), 7 zeınetker (2013-2014 jyldar aralyǵynda kezekte), 60 tolyq emes otbasy (2012–2017 jyldar aralyǵynda kezekte), jeńildigi boıynsha Ekinshi dúnıejúzilik soǵysqa qatysqandarmen teńestirilgen 4 ardager bar.