Almatyda 124 azamatqa jalǵa beriletin páter kilti tabystaldy.
Áleýmettik qyzmetter úıi ǵımaratynda Almatyda úı kezeginde turǵan 124 azamatqa jalǵa beriletin páter kilti tabystaldy, dep habarlaıdy aqshamnews.kz
Baspanaly bolý baqytyna ıe bolǵandar qatarynda jetim balalar, İ, İİ top múgedekteri, tolyq emes jáne kópbalaly otbasy músheleri, zeınetkerler men múgedek balalardy tárbıelep otyrǵan ata-analar bar.
Almaty qalasynyń Komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly júrekteri lúpildep, páter kiltin alýǵa kelgen turǵyndardy quttyqtap, úıdi paıdalaný boıynsha tehnıkalyq qyzmetke qatysty erejeni egjeı-tegjeıli túsindirip berdi. Ol sondaı-aq, beriletin páterlerdiń jaı-kúıine toqtaldy.
"Qazir turǵyndar kelisimshartqa qol qoıǵannan keıin, úıleriniń kiltin alady. Beriletin páterler daıyn tur. Onda jylý, ystyq-sýyq sý, jaryq bári qosylǵan. Kire berýge ıaǵnı, qonystanýǵa bolady. Biraq, turǵyndar ýaqytsha elektr plıtalaryn qoldanýǵa týra keledi. Al gaz páter ıelerine 100% qonystanǵan soń beriledi", - dedi Ǵalymjan Ábdishúkiruly.
"Bir saǵat erte kelip aldym. 9:00-den bastap osynda otyrmyn. Kóp balaly ana retinde 2005 jyldan beri páter kezeginde turdym. Osy úıdi kútkenime 15 jyl boldy. Mine, 74 jasqa kelgende maǵan osyndaı baspana baqyty buıyrypty. Qýanyshymda shek joq. Áli sene alar emespin. Barlyǵyńa rahmet", – deıdi almatylyq Aınagúl Erkeshova.
Páter kiltin alýǵa kelgen turǵyndardyń arasynda óziniń emosıasyn jasyra almaı, erekshe sezimmen áńgime aıtyp otyrǵan jas kelinshekke jaqyndadyq. Ózin Saltanat dep tanystyrǵan jas ana bul páterdi 2014 jyldan beri kútip júr eken.
"Bul páterdi kútkenimizge 10 jyl bolypty. Endi bizdiń ózimizdiń as bólmemiz, ózimizdiń kir jýatyn mashınamyz, televızorymyz bolady. Dál qazir júregim jarylardaı qýanyp turmyn, kilt alǵanda jylap ta qalýym múmkin", - deıdi erekshe kútimdi qajet etetin balanyń anasy.
Almaty qalasynyń ákimi Erbolat Dosaevtyń tapsyrmasymen 2024 jyly qaladaǵy komýnaldyq turǵyn úı qorynan 2000 jaldamaly páter bólingen bolatyn. Birinshi jartyjyldyqta Naýryzbaı men Medeý aýdandarynda 1080 otbasy jaldamaly turǵyn úıden páter ıelendi. Qarasha aıynda taǵy 920 almatylyqqa kilt tabystalyp, olar Naýryzbaı aýdanyndaǵy jańa páterlerge qonystanady.
Máselen, 1 qarashada páter kezeginde turǵan – 201 turǵynǵa, 5 qarashada – 200 turǵynǵa, 7 qarashada 175 qala turǵynyna páter kiltteri tabystaldy. Al búgin 15 qarashada áleýmettik osal topqa jatatyn 124 almatylyq qonys toıyn toılaǵaly otyr.