Bul týraly Bas prokýror aıtty.
Qazaqstannyń Bas prokýrory Berik Asylov Májilistiń jalpy otyrysynda qańtar oqıǵasy boıynsha terorızm aktileri boıynsha 46 qylmystyq is tergelip jatqanyn aıtty, dep habarlaıdy Almaty-akshamy.kz QazAqparatqa silteme jasap.
«Vedomstvoaralyq jedel tergeý toby 4 baǵytty pysyqtaýda. Birinshi. Uıymdastyrý jáne qatysý. Jappaı tártipsizdikter boıynsha 44 qylmystyq is tekserilip jatyr. Aqtóbe jáne Jambyl oblystarynda 9 uıymdastyrýshy qamaýǵa alyndy. Olar tártipsizdikterge, memlekettik jáne komersıalyq nysandardy qıratýǵa shaqyrdy degen kúdikke ilindi. Tártipsizdikterge qatysýshylarǵa qatysty 15 qylmystyq is qozǵaldy. Osy ister boıynsha 527 adam kúdikti retinde ótýde. 278 adam qamaýǵa alyndy», - dedi Bas prokýror Májilistiń jalpy otyrysynda.
Sondaı-aq, ol jappaı tártipsizdik pen terorızm aktileriniń aıyrmashylyǵy nede ekenin túsindirdi.
«Ekinshi. Terorızm aktileri boıynsha 46 qylmystyq is tergelýde. Barlyq aıyptalýshylar boıynsha jedel izdestirý sharalary júrgizilýde. Bul jerde jappaı tártipsizdik pen terorızm aktileriniń aıyrmashylyǵy nede ekenin túsindirgim keledi. Tártipsizdikter men terorıstik shabýyldar kezinde zorlyq-zombylyq, qıratý, qarýly qarsylyq oryn alady. Biraq tártipsizdikter retsiz, bılikke eshqandaı talaptar qoıylmaıdy. Óz kezeginde terorıstik aktilerdiń maqsaty – halyqty qorqytý jáne memlekettik organdardyń qyzmetin ádeıi toqtatý. Bılikke talaptar qoıylady, strategıalyq obektiler, bılik pen quqyq qorǵaý organdary qarý-jaraqpen basyp alynady nemese joıylady», - dedi Berik Asylov.