Qazaqstan musylmandary dinı basqarmasynyń tóraǵasy Naýryzbaı qajy Taǵanuly Arapat aımaǵynda Qajylyq mısıasynyń uıymdastyrýymen ótken «Bir mezette – bir nıet» is-sharasyna qatysyp, qajylarmen birge duǵa jasady, dep habarlaıdy Almaty-akshamy.kz muftyat.kz-ke silteme jasap.
«Ýa, Alla Taǵala! Sen Qıamet kúniniń Iesisiń! Bizdiń táýelsizdigimizdi qıametke deıin máńgilik ete gór. Elimizdiń shetin jaýdan, ishin daýdan saqtaı gór. Myń qubylǵan zamanda halqymyzdy qubylasynan jańyldyra kórme. Elimizge amandyq, jerimizge tynyshtyq násip et. Qazaq eliniń erteńi úshin shybyn janyn qurban etip, urpaq bolashaǵy jolynda sheıit bolǵan ata-babalarymyzdy óz keńshiligińmen meıirimińe alǵaısyń. El qamynda, din qamynda júrgen asyl azamattarymyzǵa Óziń jar bolǵaısyń. Elimiz ben jerimizdi túrli tabıǵı apattardan aman saqtaǵaısyń. Bizdiń halqymyzdy tosynnan keletin synaqtardan aman etkeısiń. Jastarymyzǵa ıman, qarıalarymyzǵa qýat bergeısiń. Bizdi jáne urpaǵymyzdy adastyra kórme. Bizdi eki dúnıe baqytyna bóleı gór» dep duǵa jasady Bas múftı Naýryzbaı qajy Taǵanuly.
