Imamdardyń jan-jaqty, bilimdi bolýy – zaman talaby.
QMDB baspasóz qyzmetiniń habarlaýynsha, Naýryzbaı qajy Taǵanuly Almaty qalasyna jasaǵan resmı sapary barysynda Nur-Múbarak ýnıversıtetinde ımamdarǵa «Daǵýat ádisteri» taqyrybynda dáris berdi, dep habarlaıdy Almaty-akshamy.kz
Imamdarǵa nasıhat aıtýdyń tásilderin jan-jaqty túsindirgen Bas múftı: «Ózderińiz jaqsy bilesizder, jyl basynda men barsha din qyzmetkerine baǵdarlyq baıandamamdy joldadym. Osy baǵdarlyq baıandamamda ımamnyń qoǵamdaǵy róli men ornyn aıryqsha atap óttim. Óıtkeni ımam – qoǵamdy tárbıeleýshi, aǵartýshy tulǵa. Otanshyl, eńbeksúıgish, amanatqa adal, ata-anasyn qadirleıtin ımandy urpaq tárbıeleýde ımamnyń atqaratyn róli erekshe. Halqymyzdyń rýhanı damýyna, qoǵamda otbasy qundylyǵynyń artýyna aǵartýshy ustazdar men din qyzmetkerleri úlken úles qosyp keledi. Imamdardyń jan-jaqty, bilimdi bolýy – zaman talaby. Din qyzmetkerleri myqty ýaǵyzshy bolýymen qatar, únemi izdenis ústinde júrip, salaýatty ómir saltyn saqtap, súnnet jolynan taımaýy tıis», - dep atap ótti.