Energıa kózi shtattyq rejımde jumys istep tur.
Ekibastuz qalasyndaǵy apat saldaryn joıý jónindegi jedel shtab 7 jeltoqsannyń tańyna deıin atqarylǵan jumystar jóninde málimet usyndy, dep habarlaıdy Almaty-akshamy.kz Úkimettiń Telegram-kanalyna silteme jasap.
Jedel shtab basshysy – Premer-Mınıstrdiń birinshi orynbasary Roman Sklárdyń aıtýynsha, 7 jeltoqsan saǵat 08:00-degi jaǵdaı boıynsha, zardap shekken barlyq úıge jylý berildi. Jelilik sýdyń parametrleri: qysymy 8,8 kg/sm2, túzý baǵytta 83 gradýs, túzý jáne keri baǵytta 56 gradýsty quraıdy.
«Energıa kózi shtattyq rejımde jumys istep tur. Ekibastuz JEO qaladaǵy jylýdy qalpyna keltirý boıynsha qajetti barlyq jumysty atqaryp jatyr. Alaıda, ókinishke qaraı, sońǵy kúnderi oryn alǵan oqıǵalardyń saldarynan bolǵan gıdravlıkalyq rejımniń balanstan aýytqýy, sonyń ishinde tutynýshylar men PIK-terdiń jylý tasymaldaǵyshtaǵy sýdy ruqsatsyz aǵyzýy bul jumysty qıyndatyp otyr.
Barlyq turǵyndarǵa shydamdylyq tanytqany úshin alǵys bildiremiz jáne aldaǵy 2-3 kúnde birlesken kúsh-jigerdiń arqasynda jylýmen qamtý tolyǵymen qalpyna keledi dep oılaımyz», - delingen jedel shtab málimetinde.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdaı jarıalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestısıalardyń jetkiliksizdigi ataldy.
Memleket basshysynyń tapsyrmasy boıynsha Premer-Mınıstrdiń birinshi orynbasary Roman Sklár apat saldaryn joıý jumystary aıaqtalǵansha Ekibastuzda bolatyny habarlandy.