Bala – úlken baqyt!
Búgin úıdemin. Kishkene aýyryńqyrap qaldym.
«Altyn asyǵym» men «Kúmis qasyǵym» kúnde ózderi oıanyp, sháı qoıyp ishpese de ústeldegi bardy jep, sabaqtaryna kete beredi.
Búgin oıansa, ekinshi bólmede men júr ekenmin. Qýanyp ketti. Ásirese, «Kúmis qasyǵym».
Aǵasyna da erkeleı ketip, «Altyn asyǵymdy» qaıta-qaıta qushaqtaı beredi. Bir-birine «qaıyrly tań» dedi. Ana retinde bul sátti kórgenime men de qýandym.
Áıtpese, kúnde balalar uıyqtap jatqanda turyp kete beremiz. Ákesi ekeýmiz keshke bir-aq oralamyz.
Úsheýmiz sháı ishtik. «Kúmis qasyǵym» jep otyrǵan árip-pechenelerimen «ANA» dep jazdy, qýanyp otyrǵany.
– Ákeńdi de jazyp qoısańshy, balam, – dedim.
– Pechenelerde «á» árpi joq eken. «Papa» dep jaza bereıin be onda?, – dedi sosyn.
– Onda sen ákeńe telefon soǵyp qoıǵyn qazir, qaıyrly tań aıtyp, – dedim.
Arsalańdap júgirip ketti.
– Búgin úıde mama bar, jumysqa barmapty, – dep jatty sosyn telefonnan.
Baqytty bolý úshin osyndaı sáýleli bir sát te jetip jatyr.
Bala – úlken baqyt!