Almaty ákimi Baqytjan Saǵyntaev jumys sapary kezinde abattandyrý jumystary júrip jatqan Kishi Almaty ózeni boıyndaǵy jaıaý júrginshi aımaǵynda boldy.
Baqytjan Saǵyntaev óziniń Instagram-daǵy akkaýntynda jaıaý júrginshi jolyndaǵy negizgi ózgerister týraly aıtty, dep habarlaıdy Almaty-akshamy.kz
«Terenkýr jaıqalyp keledi. Uzyndyǵy 9 shaqyrymdaı bolatyn jaıaý júrginshiler jolynyń abattandyrý jumysy aıaqtalýǵa jaqyn. Ne isteldi? Eń aldymen, 5 myńǵa jýyq butaly ósimdik otyrǵyzylyp, jasyl qor retke keltirildi. Onyń betkeıdi nyǵaıtyp, jaǵalaýdyń qulaýyna jol bermesi anyq. Álbette, jasyl aımaq aǵzanyń qalpyna kelýine yqpal etetin arnaıy mıkroklımatty saqtaıdy. Terenkýrdyń emdik maqsatta salynǵany bekerden emes», — dep jazdy Almaty ákimi.
Onyń aıtýynsha, ekinshiden, arnalar retke keltirilip, ol jer tunba men qumnan tazartyldy. Gabıon konstrýksıalary nyǵaıtylyp, qalpyna keltirildi. Maqataev kóshesindegi kópir qaıta jóndeýden ótip, gıdrotehnıkalyq qurylys jańartyldy. Bul Kishi Almaty ózeniniń ótkizý múmkindigin mınýtyna 0,5 tekshe metrden 2,5 tekshe metrge deıin ulǵaıtty. Eki metrlik jerler barynsha úsh metrge deıin keńeıtilip, asfált aýystyryldy.
«Qala turǵyndaryna yńǵaıly bolý úshin oryndyqtar jańartylyp, teńiz deńgeıiniń bıiktigin kórsetetin navıgasıalyq stendter men aqparattyq stellalar qoıyldy. Budan ózge ál-Farabı dańǵylynyń astyndaǵy tonnel abattandyrylyp, Oqýshylar saraıy ǵımaratynyń artyna qaraý alańy salyndy. Keńistiktiń úılesimdiligi men tutastyǵyn saqtaý úshin barlyq jerde aǵash paıdalanyldy», — dep atap ótti Baqytjan Saǵyntaev.
Abattandyrý jumystary aıaqtalýda. Sanıtarlyq torapty qosý, balalar alańdaryn jasaý, jekelegen ýchaskelerdi abattandyrý ǵana qaldy.
Jumys sapary kezinde qala ákimi Qazaqstan qonaq úıiniń artyndaǵy Drýjba tynymbaǵyn abattandyrý jáne Abaı atyndaǵy QazUAOBT janyndaǵy tynymbaqtyń tarıhı kelbetin qalpyna keltirý jumystarynyń nátıjelerin kórdi.
Budan ózge, Baqytjan Saǵyntaev fontandy rekonstrýksıalaý jáne Á.Qasteev atyndaǵy Memlekettik mýzeı aýmaǵyn abattandyrý jónindegi jumystardyń bastalýymen tanysty.