Almatynyń mıllıonnan astam turǵyny egý naýqany bastalǵannan beri COVID-19-ǵa qarsy vaksınalandy.
«Almaty» telearnasynyń Akimat LIVE baǵdarlamasynyń tikeleı efırinde qala ákimi Baqytjan Saǵyntaev megapolıs turǵyndaryn epıdemıologıalyq ahýaldyń jaqsarǵanyna qaramastan COVID-19 vaksınasyn keıinge qaldyrmaýǵa shaqyrdy, dep habarlaıdy Almaty-akshamy.kz
Tek vaksınalanǵan azamattar pandemıanyń aıaqtalýyn jaqyndatýǵa kómektesedi.
Qala ákimi Baqytjan Saǵyntaev Almatyda halyqty koronavırýsqa qarsy jappaı vaksınalaý 2 sáýirden bastalǵanyn eske saldy. Sol kezde osy maqsattar úshin elimizdegi eń kóp egý pýnktteri – 250, tek medısınalyq uıymdar bazasynda ǵana emes, mektepterde, mádenıet, sport obektilerinde, bazarlarda jáne SOO-da boldy. Búginde qalada 132 vaksınalaý pýnkti jumysyn jalǵastyrýda, 756 adamnan turatyn 201 egý brıgadasy tolyq rejımde jumys isteıdi.
Baqytjan Saǵyntaev ekpe alǵan mıllıonnan astam almatylyqtardyń belsendiligi arqasynda koronavırýsty juqtyrý tizbeginiń kópshiligin úzip, aýrýdyń taralý qarqynyn tómendetýge qoljetti dep sanaıdy. Olardyń ishinde 24 654 quqyq qorǵaý organdarynyń qyzmetkeri, 35 469 (100%) pedagog, 38 935 (100%) medısına qyzmetkeri bar.
Almaty ákimi pandemıa áli aıaqtalmaǵandyqtan, vaksınalaný qarqynyn kúsheıtý qajettigin atap ótti. Ol qalada da, elde de, búkil álemde de koronavırýsqa qatysty jaǵdaıdyń birde jaqsaryp, birde nasharlaı túsetinin aıtty. Alaıda, almatylyq epıdemıologtardyń, vırýsologtardyń, dárigerlerdiń jáne medpersonaldyń arqasynda Almatyda dert tómendedi. Sondyqtan qalanyń árbir turǵyny vaksınalaný arqyly ujymdyq ımýnıtetti qalyptastyrýǵa kómektesýi tıis.
Tek ótken táýlikterde 2 100-den astam qala turǵyny vaksınanyń birinshi komponentin aldy. Qarasha aıynyń ortasynan bastap KVI vaksınasyn alýǵa buryn ekpe almaǵandar belsendi túrde qosyldy. Búginde Pfizer preparatymen 8 496 adam vaksınalandy, onyń ishinde júkti áıelder – 529, emizýli áıelder – 2 026 jáne balalar – 5 941.
Baqytjan Saǵyntaev tek vaksına ǵana derttiń aldyn alatynyn, aýrýdyń asqynýyna jol bermeıtinin eske saldy. Bul ásirese qarttar úshin óte mańyzdy. Tilek bildirýshilerdiń barlyǵy ekpeni shekteýsiz ala alady, onyń ústine Almatyda preparattar jetkilikti: birinshi komponenttiń 166 072 dozasy, ekinshi komponenttiń 219 620 dozasy bar.
Qalada 22 qarashadan bastap revaksınasıadan ótýge bolady. Ázirge KVI vaksınasynyń úshinshi dozasyn medısına qyzmetkerleri, pedagogtar, kúsh qurylymdarynyń qyzmetkerleri, medısınalyq-áleýmettik mekemelerdiń qyzmetkerleri men kontıngenti, 60 jastan asqan adamdar alady. Búgingi kúni barlyǵy 315 adam revaksınalandy. Qazirgi kezde ınaktıvırlengen: QazVac (RK), Vero Sell (KNR) vaksınalaryn alýǵa bolady. QR Densaýlyq saqtaý mınıstrligi «Spýtnık Laıt» vaksınasyn jetkizý boıynsha kelissózder júrgizýde. Qalǵan almatylyqtar úshin revaksınasıanyń ekinshi kezeńi 2022 jyldyń qańtarynan bastalady.
Almatyda koronavırýs dertiniń sharyqtaý deńgeıi ótkenine qaramastan, megapolıste juqtyrýdyń jańa jaǵdaılary tirkelýde. Ótken táýlikte koronavırýstyq ınfeksıanyń 123 jaǵdaıy tirkeldi. Infeksıalyq stasıonarlarda 458 adam, onyń ishinde 24 bala bar. Reanımasıada 51 naýqas ómir úshin kúresýde.