Bul kúnderi Tokıo Olımpıadasynda grek-rım kúresinen básekeler jalǵasyp jatyr. Qazaqstan sapynan kilemge shyqqan qos balýan da qarsylastaryna alǵashqy aınalymda jol berdi. Ulttyq quramanyń bas bapkeri Baqtıar Baıseıitov shákirtteriniń jeńilisin jattyqtyrýshylardyń tapsyrmasyn oryndamaǵanymen túsindirdi.
"Keshe Meırambek Aınaǵulov jattyqtyrýshylar tapsyrmasyn oryndamady. Biz qatań eskertip, tyıym salǵan ádis-tásildi kilemge shyqqan sátte-aq istep, óz qatesiniń kesirinen qarsylasyna jol berdi. Bizge yńǵaıly bolatyndaı kúres stılin túsindirip, oǵan jetkizgenimizben, bizdiń tapsyrmamyzdy kilemge shyqqanda oryndaǵan joq.
Búgin Demeý Jadyraev beldesýdi upaı sanymen jeńip turǵan bolatyn. Beldesýdiń sońǵy sátinde qarsylasyna ese jiberdi. 30 sekýndtyq úzilis bolǵan kezde bárin túsindirip, beldesýdi sońyna deıin bermeı, baqylaýǵa alý keregin aıttyq. Demeýdiń dál osylaı sońǵy sátte ádiske túsip, qarsylasyna upaı syılaǵanyn biz de túsine almadyq.
Erteń Nursultan Tursynov beldesedi. Kúrestiń qandaı bolatynyn kilem kórsetedi", - deıdi bas bapker Baqtıar Baıseıitov.
Aıta keterligi, grek-rım kúresinen Olımpıada oıyndaryna Qazaqstan úsh joldama jeńip alǵan. Tokıo Olımpıadasyna 60 kelide Meırambek Aınaǵulov, 77 kelide Demeý Jadyraev qatysyp, alǵashqy aınalymda jeńilis tapty. Erteń, 3 tamyz kúni 87 kelige deıingi salmaq dárejesinde Nursultan Tursynov kúresetin bolady.