Ulttyq bank tóraǵasynyń da nesıesi bar.
Tóraǵanyń aıtýynsha, tabysy turaqty ári kóp adam úshin nesıe kerek dúnıe.
«Áıelim nesıe almaıdy, ózimde kredıt bar» degen tóraǵa «tutynýshy nesıesiniń deńgeıin rettep, ony baqylaý kerek» dep sanaıdy.
Búgin jýrnalıserge brıfıń ótkizgen Ulttyq bank tóraǵasy Tımýr Súleımenov Qazaqstan halqynyń nesıesine qatysty pikir bildirdi.
Onyń aıtýynsha, kez kelgen adam tabysyna qaraı áreket etýi kerek. Iaǵnı, Súleımenov atap ótkendeı, tabysy turaqty ári kóp adam úshin nesıe kerek dúnıe. Biraq, «jyldyq tabysy nebary 5 mln teńge bolatyn adam 10 mln teńge nesıe almaýy kerek» dep sanaıdy ol.
«Meniń oıymsha, Qazaqstanda halyq nesıeniń astynda otyrǵan joq. Biraq, adamdardyń keıbir bóliginiń nesıesi kóp ekenine nazar aýdarý kerek sıaqty. Óıtkeni, eger adamda kiris bolmaı, biraq nesıesi bolsa, bul máselege nazar aýdarý kerek. Nesıe alyp, ony tóleı almaǵan adam ne ákimdikke keledi, ne mınıstrlik aldyna barady. Sondyqtan, meniń oıymsha, tutynýshy nesıesiniń deńgeıin rettep, ony baqylaý kerek. Bul bankke de, jalaqyǵa deıin aqsha beremiz deıtin uıymdarǵa da qatysty. Kim tóleı alsa, nesıe soǵan berilý kerek. Biraq, kirisi joq, jalaqysy joq adamǵa onyń kirisin teksermeı nesıe bere salýǵa bolmaıdy», - deıdi Tımýr Súleımenov.
Jýrnalıserdiń suraǵyna jaýap bergen ol áıeli nesıe almaıtynyn, al ózinde tutynýshylyq kredıt bar ekenin aıtty.