4 qyrkúıekten bastap Qazaqstanda bankrot dep tanylǵan azamattardyń tizimderi jarıalana bastady.
QR Qarjy mınıstrligi Memlekettik kirister komıtetiniń málimeti boıynsha, qazirdiń ózinde bereshegi 435 mln teńgeni quraıtyn (kredıttik búronyń málimeti boıynsha) 309 adam bankrot dep tanyldy, dep habarlaıdy Almaty-akshamy.kz QazAqparatqa silteme jasap.
Atalǵan azamattarǵa 14-14 qyzmeti boıynsha sms-habarlama arqyly sottan tys bankrottyq rásiminiń aıaqtalǵany jáne bankrot dep tanylýy týraly habarlama kelip tústi, sondaı-aq olar týraly aqparat «e-gov» portalynda ornalastyryldy.
Bankrot dep tanylǵan azamattardyń 22-si memlekettik ataýly áleýmettik kómek alýshy bolsa, 232-si bes jyldan astam nesıe qaryzdaryn óteı almaı júrgender.
Bankrot dep tanylǵan tulǵalardyń ortasha jasy 40 jasty quraıdy. Búginde bankrotqa ushyraǵandardyń eń jasy 1 mıllıon teńgeden astam qaryzy bar Qyzylorda oblysynyń turǵyny, ol 23 jasta. Al eń qart bankrot bolǵan azamat Mańǵystaý oblysynyń 65 jastaǵy turǵyny boldy, onyń 3 mıllıon teńgeden astam qaryzy esepten shyǵarylady.
Bul azamattar aýyr qaryzdan qutyldy.
Degenmen, bul rásimniń kelesi saldary bar – bes jyl ishinde jańa nesıe alýǵa tyıym salynǵan jáne mundaı azamattardyń ústinen úsh jyl boıy qarjylyq monıtorıń júrgiziledi.