Kúdiktiniń seriktesteri ártúrli merzimge bas bostandyǵynan aıryldy.
Qazaqstandaǵy bankterdiń birinde jalǵan eýro banknottaryn aıyrbastap, shetelge qashqan kúdikti azamatsha Shvesıadan elge ekstradısıalandy. Bul týraly QR Bas prokýratýrasynan málim etti, dep habarlaıdy Almaty-akshamy.kz.
«Ekstradısıalaý týraly sharttyń bolmaýyna qaramastan, Shvesıanyń Ádilet mınıstrligi qarym-qatynas qaǵıdaty negizinde jalǵan banknottardy iri mólsherde ótkizgeni úshin izdeýde júrgen azamatsha B.-ny Qazaqstanǵa berý týraly elimizdiń Bas prokýratýrasynyń ótinishin qanaǵattandyrdy», - delingen vedomstvo aqparatynda.
Málim etilgendeı, Qazaqstan azamatshasy 2019 jylǵy jeltoqsan – 2020 jylǵy qańtar aralyǵynda Qazaqstan bankteriniń birinde jumys isteıtin qyzmetkerdiń kómegimen jalǵan eýro banknottaryn aıyrbastaǵan degen kúdikke ilinip otyr.
Qylmys jasaǵannan keıin B., qazaqstandyq quqyq qorǵaý organdarynan boı tasalady. Oǵan halyqaralyq izdeý jarıalandy.
Onyń seriktesteri ártúrli merzimge bas bostandyǵynan aıyrý jazalaryna kesilgen.
«Búgin Bas prokýratýra men Qarjylyq monıtorıń agenttiginiń qyzmetkerleri Syrtqy ister mınıstrliginiń kómegimen kúdikti B.-ny qylmystyq jaýaptylyqqa tartý úshin Qazaqstanǵa ekstradısıalady».
Qazirgi ýaqytta ol Qylmystyq-atqarý júıesi komıteti Astana qalasy boıynsha departamentiniń tergeý ızolátoryna qamaldy.
«Atalǵan qylmysty jasaǵandar 5 jyldan 10 jylǵa deıin bas bostandyǵynan aıyrylýy múmkin», - dedi Bas prokýratýranyń baspasóz qyzmetinen.