Búgin - QR Halyq ártisi Bolat Aıýhanovtyń týǵan kúni.
Qazaq balet óneriniń tarıhynda óshpes iz qaldyrǵan eleýli tulǵa, QR Halyq ártisi Bolat Aıýhanov óziniń týǵan kúninde Almaty qalasynyń turǵyndary men qonaqtaryn «Gýdýlla - mat Esmeraldy» baletiniń tusaýkeserimen qýantpaq, dep habarlaıdy Almaty-akshamy.kz.
Bolat Ǵazızulynyń jetekshiligimen «Almatynyń jas baleti» ujymy álemniń túkpir-túkpirindegi kórermenniń joǵary baǵasyna ıe bolǵan. Onyń «Meniń baletim», «Sezimder ómirbaıany» jáne taǵy basqa kitaptary oqyrman arasynda keńinen tanymal.
Aıta ketsek, Bolat Ǵazızuly Aıýhanov 1938 jyly 13 qyrkúıekte Semeı qalasynda týǵan. A.V. Lýnacharskıı atyndaǵy Máskeý teatr óneri ınstıtýtynyń baletmeısterlik fakúltetin bitirgen. QR memlekettik akademıalyq bı teatrynyń negizin qalaýshy ári turaqty jetekshisi, QR halyq ártisi, áıgili horeograf, profesor. «Qurmet belgisi», Eńbek Qyzyl Tý ordenderimen marapattalǵan. «Platınalyq Tarlan» (2000), «Altyn Adam» (2008) syılyqtarynyń, Memlekettik syılyqtardyń laýreaty.
Almaty-akshamy.kz ujymy Bolat Ǵazızulyn týǵan kúnimen quttyqtap, shyǵarmashylyq tabys tileıdi.
Tusaýkeser 13 qyrkúıekte, saǵat 19.00-de Almatydaǵy Abaı atyndaǵy qazaq memlekettik akademıalyq opera jáne balet teatrynda ótedi.