Erjan Babaqumarov Almatydaǵy áleýmettik salanyń damýy jaıynda áńgimeledi
Almaty qalasy Qoǵamdyq keńesiniń otyrysynda qala ákiminiń orynbasary Erjan Babaqumarov shaharda densaýlyq saqtaý, bilim berý, sport jáne mádenıet júıelerin damytý boıynsha qandaı jumystar júrgizilip jatqanyn aıtty, dep habarlaıdy Almaty-akshamy.kz
Qazirgi kezeńde densaýlyq saqtaý júıesi – basty ári negizgi basymdyq. Jalpy, koronavırýstyq ınfeksıaǵa qarsy turý modeli qurylyp, onyń tájirıbesi búkil el boıynsha eskerildi. Model "jedel járdemniń" rólin ózgertýge, juqpaly aýrýhanalardyń jumysyn juqtyrǵandardyń jaǵdaıy men qaladaǵy indettiń qarqynyna baılanysty tósek-oryndaryn basqarý úshin úsh eshelonǵa jikteýge qatysty. BMJK jumysy qaıta qurylyp, onda 364 mobıldi brıgada toptastyryldy, ýchaskelik dárigerlerdiń áleýeti kúsheıtildi. Ótken jyly qurylǵan Telemedısına ortalyǵy arqyly pasıentterdi úıde emdeýge baqylaý jasaldy. Ólimmen kúresý úshin biryńǵaı reanımasıalyq top jumys isteıdi. Pasıentterdi ýaqtyly dıagnostıkalaýdy qamtamasyz etetin 28 KT–ortalyǵynan turatyn jalpyqalalyq jeli quryldy.
Qabyldanǵan sharalar nátıjesi ınfeksıanyń tórt tolqynyn jeńýge múmkindik berdi. Tórtinshi tolqyn kezeńinde 10 myńǵa jýyq ınfeksıalyq tósek daıyndalyp, olardyń 9 myńǵa jýyǵy iske qosyldy. Delta tolqynynyń shyńynda olardyń júktemesi 70%-dan aspady. Ákimdik óz rezervinde 1000 tósek-oryn ustady. Dárilik preparattar men jeke qorǵaný quraldary qory jetkilikti, qamtamasyz etýde irkilister bolǵan joq.
Densaýlyq saqtaý júıesi medısınalyq qyzmet sapasyn, jumys standarttaryn arttyrý jáne qala turǵyndarynyń densaýlyǵyn qorǵaýmen baılanysty basqa da máselelerdiń sheshimi boıynsha jumystardy jalǵastyrýda.
Bilim berý salasyndaǵy negizgi mindet – balabaqshalar men mektepterdegi kezektilikti tómendetý. Bul baǵytta 640 oryndy 4 memlekettik balabaqshanyń qurylysy júrgizilýde. Aǵymdaǵy jyly 12600 oryndy 8 mektep salynýda: 5100 oryndy 3 mektep bıylǵy jyldyń jeltoqsan aıynda, qalǵan 5 mektep 2022 jyldyń 2 toqsanynda paıdalanýǵa beriledi. Sonymen qatar, mektepterge 8263 orynǵa arnalǵan 17 qosymsha korpýs salynýda, onyń 9-ynda qurylys jumystary aıaqtaldy, al qalǵan 8-i 2021 jyldyń qazan aıynyń sońyna deıin qoldanysqa beriledi. Jalpy, jyl sońyna deıin jalpy sany 16 myńǵa jýyq oqýshy orny bar 31 bilim berý nysany paıdalanýǵa beriledi.
Odan bólek, balalardy qosymsha bilim berýmen qamtýdy keńeıtý úshin Inovasıalyq shyǵarmashylyqtyń eki ortalyǵy salynady, 10 myń balaǵa arnalǵan Oqýshylar saraıy jańǵyrtylady. Aǵymdaǵy jyldyń sońyna deıin 73 fýtbol, 63 voleıbol jáne basketbol alańdary, sondaı-aq vorkaýt aımaqtary men júgirý joldary bar 61 mektep janyndaǵy sport nysandaryn jańǵyrtý aıaqtalady. Sol arqyly Almaty qalasy mektepteriniń sport zaldarymen jáne sport qural-jabdyqtarymen qamtamasyz etilý kórsetkishi 100%-dy quramaq. Bul elimiz boıynsha eń úzdik kórsetkish bolary haq.
Buqaralyq sportty damytý boıynsha keshendi jumystar júrgizilýde. Bıyl jabyq sport nysandarynyń qurylysy eselep ulǵaıtyldy. 7 sport nysanynyń qurylys-montaj jumystary júrgizilýde, olardyń 6-ýy – dene shynyqtyrý-saýyqtyrý kesheni jáne 1-ýi – tenıs ortalyǵy. Aǵymdaǵy jyly jańa dene shynyqtyrý-saýyqtyrý keshenderin ornalastyrý úshin 14 qosymsha ýchaske bólindi.
Kásibı sport klýbtaryn ustaýǵa, olardy buqaralyq sportty damytýǵa qaıta bólý arqyly qarjylyq shyǵyndar qysqarǵanyn atap ótý mańyzdy. Basty mindet – jyl sońyna deıin halyqtyń keminde 35%-yn sportpen qamtý. Jan basyna qarjylandyrý tetigi arqyly jyl sońyna deıin sportpen jalpy qamtý mólsheri 40 myńǵa jýyq balany quraıtyn bolady. Qalanyń barlyq aýdandarynda 8000-nan astam adamdy qamtıtyn tegin sport seksıalary men úıirmeleri bar 100 demalys ortalyǵy jumys isteıdi. 2023 jylǵa qaraı ortalyqtardy 200-ge deıin ulǵaıtý josparlanǵan.
Mádenıet salasynda memlekettik shyǵarmashylyq tapsyrysty jan basyna qarjylandyrý jobasy engizildi, onyń aıasynda 4 jastan 17 jasqa deıingi balalar shyǵarmashylyq úıirmelerge qatysatyn bolady. Jyl sońyna deıin balalar men jasóspirimderge qatysty memlekettik shyǵarmashylyq tapsyrysty jan basyna qarjylandyrý 10 000-nan astam adamdy quraıdy.