Qarjylyq monıtorıń agenttiginiń Astana qalalyq departamenti balasynyń emine dep elden aqsha jınaǵan erli-zaıyptylarǵa qatysty alaıaqtyq faktisi boıynsha tergeýdi aıaqtady, dep habarlaıdy Aqshamnews.kz.
Jelidegi jalǵan jarnama
Tergeý nátıjelerine sáıkes, erli-zaıyptylar balasynyń vıdeolaryn, emosıalyq jazbalardy jáne Instagram men Facebook jelileri arqyly agressıvti maqsatty jarnamany paıdalanyp, myńdaǵan qazaqstandyqtardyń júregin jibitken. Olar azamattardyń senimine kirip, bas-aıaǵy 1,3 mıllıard teńgeden astam qaıyrymdylyq qarajatyn jınaǵan. Alaıda, bul qarjynyń tek 6,4 mıllıon teńgesi ǵana balanyń emine jumsalǵan. Qalǵan aqsha olardyń jeke maqsattaryna jumsalǵǵan.
Agenttiktiń málimetinshe, kúdiktiler Astanadan úsh páter, jer telimi jáne bes avtokólik satyp alǵan. Sonymen qatar, jınalǵan aqshanyń bir bóligin býkmekerlik keńsege bás tigýge paıdalanǵan.
Jınalǵan qarajat kólemin arttyrý úshin erli-zaıyptylar onyń úshten birin Meta Ads arqyly jarnamaǵa salǵan. Bul olardyń paraqshalarynyń áleýmettik jelidegi aýqymyn aıtarlyqtaı keńeıtip, qoldanýshylardan kóbirek aqsha aýdartýǵa múmkindik berdi.
Shetelde emdelýdi qoldan uıymdastyrǵan
Qarajat jınaýǵa sebepterdiń biri – Túrkıadaǵy LIV Hospital klınıkasynda 84 mıllıon teńge turatyn operasıanyń qajettiligi týraly málimdeme bolǵan. Alaıda bul soma jınalǵanymen, shetelge sapar múlde júzege aspaǵan.
Kúdiktiler shetelge ushqandaı kóriný úshin Instagram paraqshalarynda áýejaıdan túsirilgen beınerolıkterdi jarıalap, keıin "sátti operasıa" týraly jalǵan jazba salǵan.
Múlikti jasyrý áreketi
Aldyn ala tergeý bastalǵannan keıin, kúdiktiler aktıvterdi jasyrýǵa tyrysqan – jer telimin úshinshi tulǵaǵa rásimdegen. Biraq tergeý barysynda bul mámileniń jalǵan ekeni anyqtaldy.
Sottyń sanksıasymen qylmystyq jolmen alynǵan qarajatqa satyp alynǵan barlyq múlikke tyıym salyndy. Qazirgi ýaqytta kúdiktiler úıqamaqta. Qylmystyq is sotta qaralyp jatyr.