Almatyda belgisiz bireý ózin Qorǵanys mınıstrliginiń qyzmetkerimin dep tanystyryp, kóshedegilerdiń tirkelgen mekenjaıyn suraǵan, - dep habarlaıdy aqshamnews.kz
Tengrinews.kz habarlaýynsha, jaǵdaı 21 qańtarda Almatydaǵy "Moskva" saýda ortalyǵy mańynda bolǵan.
Vıdeo avtorynyń sózinshe, oǵan jáne dosyna "Qazaqstan Respýblıkasy Qorǵanys mınıstrligi" degen beıdj taqqan belgisiz er adam jaqyndap, esh túsindirmesten tirkelgen mekenjaıy týraly suraqtar qoıa bastaǵan.
"Eshqandaı aman-sálemsiz, ózin tanystyrmaı "Qaı jerde tirkelgensizder?" dep surady", - dep jazdy avtor.
Avtordyń aıtýynsha, ózin tanystyrýdy suraǵan kezde er adam naqty jaýap bermegen. Ol áskerı komısarıatta jumys isteıtinin aıtqan.
"Ol: "Meni kúte tur, polısıa shaqyramyn", - dedi de, ketip qaldy", - delingen jazbada.
Qorǵanys mınıstrligi ne deıdi?
Qazaqstan Respýblıkasynyń Qorǵanys mınıstrligi áleýmettik jelilerde taraǵan vıdeo men oqıǵaǵa qatysty jazbalarǵa pikir bildirdi.
"Vıdeoda kóringen jáne ózin Qorǵanys mınıstrliginiń qyzmetkerimin dep tanystyrǵan adam áskerı qyzmetshi emes jáne Qazaqstan Respýblıkasynyń Qorǵanys mınıstrligine esh qatysy joq", - dep habarlady vedomstvo.
Mınıstrlikte atalǵan fakt boıynsha tekserý júrgizilip jatqanyn atap ótti.
"Qorǵanys mınıstrligi ýákiletti organdarmen birlesip bolǵan jaǵdaıdyń mán-jaıyn tekserip jatyr. Tekserý nátıjesi boıynsha materıaldar zańda kózdelgen sharalardy qabyldaý úshin ishki ister organdaryna joldanady", - dep qosty vedomstvo.