QR Ákimshilik quqyq buzýshylyq týraly kodeksinde (QR ÁQBtK) bes túrli jol qozǵalysy erejesin buzǵan jaǵdaıda júrgizýshilerge qaıtadan teorıalyq emtıhan tapsyrý mindettelgen, dep habarlaıdy aqshamnews.kz
Bul buzýshylyqtar birden júrgizýshi kýáliginen aıyrýǵa ákelmeıdi, alaıda eki aı ishinde teorıalyq emtıhandy qaıta tapsyrý qajet. Eger júrgizýshi belgilengen merzimde emtıhan tapsyrmasa, sot sheshimimen kýálik kúshin joıady. Qujatty qaıtarý úshin teorıalyq jáne praktıkalyq emtıhandy qaıta tapsyrýǵa týra keledi.
BUZÝSHYLYQTAR TİZİMİ
594-BAP, 4-BÓLİK
Jyl ishinde qaıtalanǵan jaǵdaıda: jol qıylysyna nemese joldyń qıylysqan bóligine keptelis kezinde kirip, kóldeneń baǵyttaǵy kólikterdiń qozǵalysyna kedergi keltirý.
Jaza: 7 aılyq eseptik kórsetkish (30 275 teńge).
596-BAP, 4-BÓLİK
Jyl ishinde qaıtalanǵan jaǵdaıda: jaıaý júrginshiler jolymen, trotýarmen nemese jol jıegimen júrý; kólikti jolda durys ornalastyrmaý; qarsy qozǵalys nemese manevr erejesin buzý; uıymdastyrylǵan kólik nemese jaıaý kolonnany kesip ótý nemese onyń quramyna zańsyz qosylý.
Jaza: 13 aılyq eseptik kórsetkish.
598-BAP, 2-BÓLİK
Jyl ishinde qaıtalanǵan jaǵdaıda: arnaıy jaryq jáne dybys sıgnaldaryn qosqan arnaıy kólikterge jol bermeý.
Jaza: 40 aılyq eseptik kórsetkish nemese 20 saǵat qoǵamdyq jumys.
599-BAP, 2-BÓLİK
Jyl ishinde qaıtalanǵan jaǵdaıda: baǵdarshamnyń tyıym salatyn sıgnalyna nemese retteýshiniń tyıym salatyn qımylyna qaramaı ótý.
Jaza: 15 aılyq eseptik kórsetkish.
600-BAP, 2-BÓLİK
Jyl ishinde qaıtalanǵan jaǵdaıda: jaıaý júrginshilerge nemese basqa jol qozǵalysyna qatysýshylarǵa (arnaıy kólikterden basqa) jol bermeý.
Jaza: 15 aılyq eseptik kórsetkish.