«Qazaq Airan» YouTube arnasyna bergen suhbatynda birneshe jyl buryn Ózbekstannan Qazaqstanǵa qonys aýdarǵan tarıhshy ári jýrnalıs Jumamurat Shámshi elge alǵash kelgen jyldary toı-tomalaqtyń tym kóptigine tańǵalǵanyn aıtty, – dep habarlaıdy aqshamnews.kz
Onyń aıtýynsha, Ózbekstanda jyl ishinde bar bolǵany birneshe negizgi mereke ǵana atap ótiledi. Al Qazaqstanda merekeler men túrli ataýly kúnder jyl boıy úzdiksiz toılanatynyn kórip, alǵashynda qatty tańǵalǵan. Onyń sózinshe, jańa jyl men eski jańa jyl, túrli halyqaralyq jáne beıresmı merekeler, sondaı-aq týǵan kúnderdi keń kólemde atap ótý qalypty jaǵdaıǵa aınalǵan. Qoǵam belsendisi mundaı toıshyldyqtyń búdjetke de salmaq salyp otyrǵanyn atap ótti.
Sondaı-aq ol til máselesine de toqtalyp, qazaq kóp shoǵyrlanǵan óńirlerdiń ózinde ana tiliniń shubarlanyp, oryssha jáne aǵylshynsha sózderdiń aralasyp ketkenin synǵa aldy. Óziniń ósken ortasynda qazaqy bolmys pen til tazalyǵy saqtalǵanyn aıtyp, qazirgi jaǵdaıǵa alańdaýshylyq bildirdi.
Qazirgi toılardy qatań synǵa alǵan Jumamurat Shámshi qazaq dástúrinde búgingideı asta-tók qyz uzatý toıynyń bolmaǵanyn da tilge tıek etti. Onyń aıtýynsha, buryn qyz uzatý shaǵyn, qarapaıym túrde, eń jaqyn týystardyń qatysýymen ǵana ótken, al qazirgi formattaǵy dańǵazaly toılar keıingi jyldary, ásirese 2000-jyldardan beri kúrt kóbeıgen. Ol muny básekelestik pen orynsyz maqtannyń saldary dep baǵalap, toı mádenıetin retteıtin memlekettik deńgeıdegi sharalar qajet ekenin jetkizdi.