Ábilhan Qasteev atyndaǵy QR Memlekettik óner mýzeıinde otandyq sýretshi Sáken Bektıardyń «Kelte Altyn Ǵasyr» atty kórmesi ashyldy, dep habarlaıdy Aqshamnews.kz. Bul kórme birneshe onjyldyqqa sozylǵan shyǵarmashylyq izdenistiń, ishki tolǵanys pen kórkemdik tájirıbeniń nátıjesi dep otyr áriptesteri.
Kórmede sýretshiniń oılaý tásili men kórkemdik tilin jaqynyraq tanýǵa bolady. Bul jaı ǵana retrospektıva emes, bul – ýaqyt, taǵdyr, tán men syzyq týraly fılosofıalyq tolǵanys. Sáken Bektıar úshin syzyq – dalanyń tynysy men úni ispetti, sondyqtan bolar ol óz qoltańbasyn «grafıkanyń mýzykasy» dep ataıdy.
Sýretshi grafıka, keskindeme jáne ılústrasıa salasynda eńbek etedi, vızýaldy medıany poetıkalyq jáne mýzykalyq oılaý tásilderimen ushtastyrady. Onyń kórkemdik tili dástúrli akademıalyq mektepten tys damyǵanymen, sýretshi plasıka men kompozısıany názik seziný arqyly pishinge ishki serpin men yrǵaq daryta alady.
"Ekspozısıaǵa iri formatty keskindemelermen qatar, týshpen jáne qaryndashpen oryndalǵan názik grafıkalyq paraqtar da engen. «Qyz qýý nemese jergilikti mahabbat merekesi», «Qara aqqý», «Kúmis syrǵaly qazaq qyzy» sekildi serıalarynda dala mádenıetine tereń tamyr jaıǵan halyqtyq arhetıpter men motıvter kórinis taýyp, búgingi zaman turǵysynan jańasha paıymdalady. Keıingi jyldary salynǵan «Sheńber nemese úılesimge umtylys», «Atqaminer jáne onyń oljasy» atty kartınalarda sýretshi ujymdyq beısanalyq pen dalalyq vızýaldy jadyǵa júginedi", – deıdi kórme jetekshisi, mýzeıdiń «Qazaqstan beıneleý óneri» bóliminiń ǵylymı qyzmetkeri S.Syrǵabaev.
Tústik palıtrasy qanyq qara jáne ohra tústerinen bastap, ashyq sur men bozǵylt qyzǵylt reńkterge deıin almasyp otyrady. Bul túster – sýretshiniń sezimdi jetkizý amaly, sıpattaýdan góri yqpal etý quralyna aınalǵan.
Ónertanýshy Nadejda Polonskaıa sýretshi jaıly: «Onyń sýret salǵany – án aıtqandaı, al án salǵany – tynys alǵandaı... Muny kórý kerek, sózben jetkizý qıyn», – deıdi.
Sáken Bektıar Kenbee laqap atymen de tanymal. Ol Almatydaǵy «Tengry Umai» galereıasyndaǵy jeke kórmesinen bastap, Germanıa, Ispanıa, Chernogorıa jáne Ulybrıtanıadaǵy (sonyń ishinde Londondaǵy Victoria and Albert mýzeıinde) kóptegen halyqaralyq jobalar men art-rezıdensıalardyń qatysýshysy. Búginde sýretshiniń týyndylary álemniń túrli elderindegi jeke koleksıalarda saqtaýly.
Ekspozısıa tamyzdyń 1-ne deıin jalǵasady.