Endi elimizde azamattarǵa bos jumys oryndary týraly derbestendirilgen usynystar beretin jasandy ıntellekt-agent (JI-agent) paıda bolady. Bul týraly Úkimet otyrysynda Sıfrlyq damý mınıstrligi Eńbek jáne halyqty áleýmettik qorǵaý mınıstrligine usynys tastady, dep habarlaıdy Aqshamnews.kz.
Vıse-mınıstr Asqar Bıahmetovtiń aıtýynsha, jańa tehnologıany engizý arqyly árbir azamattyń jeke profıli men eńbek naryǵyndaǵy trendterge súıene otyryp, olarǵa sáıkes keletin jumys oryndary nemese oqytý kýrstary avtomatty túrde usynylatyn bolady.
“Qazirgi ýaqytta biz eń zamanaýı tehnologıalardy - JI-agentti qoldaný múmkindigin qarastyryp otyrmyz. Bizdiń sıfrlyq ónimderimiz eńbek naryǵyndaǵy qajettilikti anyqtap, azamattarǵa naqty usynystar jasaı alady”, - dedi Asqar Bıahmetov.
7 800-den astam suranysqa ıe mamandyq
Eńbek mınıstrliginiń málimetinshe, elimizde eńbek naryǵynda 7 800-den astam mamandyq suranysqa ıe. Osy qajettilikti bilim berý júıesimen ushtastyrý maqsatynda kásibı standarttarǵa saı oqý baǵdarlamalary jańartylyp jatyr. Qazirdiń ózinde 11 myńnan astam oqý baǵdarlamasy jańartylyp úlgerdi.
Sıfrlyq bank jáne II negizindegi standarttar
Memlekettik organdar "Sıfrlyq daǵdylar bankin" engizýdi bastap ketti. Bul bastama keleshekte jasandy ıntellektti kásibı standarttardy ázirleý úderisine engizýge jol ashady. Bıahmetovtiń aıtýynsha, bul ózgerister eńbek naryǵyndaǵy ahýaldy jedel taldaýǵa, standarttardy ýaqtyly jańartýǵa jáne rýtınalyq prosesterdi qysqartýǵa múmkindik beredi.
Aıta keteıik, búgin, 29 shildede Úkimet otyrysynda QR Eńbek jáne halyqty áleýmettik qorǵaý vıse-mınıstri Asqar Bıahmetov Qazaqstandaǵy jumyssyzdyq deńgeıi 4,6 paıyz ekenin málimdedi. Onyń aıtýynsha, eldegi jalpy jumyspen qamtylǵan halyq sany – 9,2 mıllıon adam.
Sonymen qatar, vedomstvo ókili qazirgi eńbek naryǵynyń qurylymy men jınaqtaýshy zeınetaqy júıesine qatysý deńgeıi birqatar qaýipterge alyp keletinin atap ótti. Atap aıtqanda, jumys isteıtin azamattardyń 30 paıyzy bolashaqta eń tómengi zeınetaqy mólsherine ǵana úmit arta alady.