Qazaqstanda klınıng qyzmetí shamamen onshaqty jyl būryn tanyla bastady. Qazír úıín jınatu úshín klınıng shaqyrmaıtyn otbasy sırek kezdesedí. Soǵan qaramastan, qoǵamda álí kúnge deıín áıel adam óz úıín ózí jınauy kerek, būl jalqaularǵa kerek qyzmet nemese klınıng tek baılarǵa arnalǵan degen túsíník bary ras.
Osy taqyrypqa qatysty qoǵamdaǵy píkírlerdí eskere kele klınıngke degen kózqarasty shartty túrde jetí sanatqa bóluge bolady:
1. Klınıngke úzíldí-kesíldí qarsy adamdar. Olardyń oıynsha, úıde kelín bar, úıdíń otanasy bar, qyzy men basqa da otbasy múshelerí bar, qysqasy árkím óz úıín ózí jınauy kerek.
2. Úıge bóten adamnyń kíruíne, zattaryna qol tıgízuíne qarsylyq tanytatyndar.
3. Bógde adamdarǵa senbeı, bírdeńem joǵalsa she, zatymdy syndyryp almaı ma? dep alańdaıtyndar.
4. Klınıngtí tek jóndeu jūmystarynan keıíngí tazalyq úshín ǵana shaqyratyndar.
5. Jylyna bír ret tolyq tazalatu úshín kásíbı maman shaqyrudy qūp kóretínder.
6. Klınıngke oń kózqarastaǵylar, óıtkení úı jınau – áıeldíń ómírlík mıssıyasy emes dep esepteıtínder.
7. Úıdí basqa adamnyń jınauyna qarsy emes, bíraq ol klınıng qyzmetí emes, tek bír tekserílgen, tūraqty úı qyzmetkerí bolǵanyn qalaıtyndar.
Túrlí kózqarastyń baryna qaramastan, bízdíń qoǵam klınıngtíń qalypty árí yńǵaıly qyzmet ekenín qabyldaı bastady. Būl dál tamaq jetkízu qyzmetí sıyaqty servıstíń túrí. Demek, bolashaq kelínder úshín tūrmysty basqa adamdarǵa seníp tapsyryp, uaqytyn odan da jaǵymdy ísterge arnauǵa múmkíndík bar. Eń bastysy eneníń de, kúıeudíń de kózqarasyn ózgertu.
Klınıng turaly el tūrǵyndary ne oılaıdy?
Nūrgúl, 39 jasta:
Meníń kúıeuím būl qyzmetke asa jaqsy qaraı bermeıdí. Onyń otbasynda eshkím klınıng qoldanbaǵan, «basqalar da báríne úlgeríp júr ǵoı, bíz de ísteı alamyz» deıdí. Bírde jóndeuden keıín klınıng shaqyrdyq, sol kezde ǵana rıza boldy. Bíraq kúndelíktí nemese aı saıynǵy tazalyqqa klınıng shaqyruǵa qarsy. «Ózíńe qıyn ba?» deıdí. Al men aıyna bír ret tolyq tazalap beruge shaqyrsaq jetkílíktí der edím.
Kámshat, 27 jasta:
Óz basym klınıngke óte qarsymyn, al kúıeuím kerísínshe jaqsy kózqarasta. Úıde bóten adamdardyń júrgenín, meníń dúnıelerímdí ūstaǵanyn ūnatpaımyn. Bír ret shaqyryp kórdím, sapasy da kóńílímnen shyqpady, odan keıín típtí būl turaly oılamaıtyn da boldym.
Zarına, 25 jasta:
Bízdíń otbasymyzda klınıngke degen qarsylyq joq, bíraq ázírge būl qyzmettí qaltamyz kótermeıdí, sebebí úıímíz úlken, al mūndaı úlken aumaqtyń sharshy metríne esepegende aıtarlyqtaı qymbatqa shyǵady.
Taısıya, klınıng kompanıyasynyń negízín qalaushy:
Bízdíń negízgí klıentímíz – orta tap ókílderí. Olar – uaqyty tapshy, óz eńbegín baǵalaıtyn adamdar. Bízdíń qyzmettí qaltasy kótermeıtínder kóbíne úıín ózí jınaıdy, al auqatty adamdar kóbíne tūraqty úı qyzmetkerlerín jaldaıdy. Al jóndeuden keıíngí tazalyqqa kóp otbasy qarjylyq jaǵdaıyna qaramastan klınıng shaqyrady, sebebí ol – kúrdelí, arnaıy qūral men bílímdí talap etetín jūmys.
Qazaqstanda álí de «pysyq áıel bárín ózí ísteuí kerek» degen kózqaras bar. Bíraq megapolısterde būl kózqaras bírtíndep ózgeríp keledí. Qalada ómír qarbalas, kóp áıel erímen bírdeı jūmys ísteıdí, sondyqtan klınıng – úlken kómek.
Sūranysqa kóp ıe bolǵan qyzmetímíz – tolyq tazalau. Būl jūmys bír kúnge sozylady, óıtkení úıdegí múlík pen qabyrǵa tolyq tazalanady.
Qauípsízdíkke alańdaıtyn klıentter úshín bíz jūmysqa kíríspes būryn kelísímshart jasaımyz jáne múlíkke tolyq jauap beremíz. Sonymen qatar, klınerler páterden shyǵar aldynda sómkelerín ashyp kórsetedí – būl senímdílíktí arttyrady.