Olımpıada chempıony bapkerlik jumysqa aýysty.
Rıo-de-Janeıro Olımpıada chempıony Dmıtrıı Balandın óz mansabyn aıaqtap, bapkerlik jumysqa aýysty. Bul týraly QR MSM Sport jáne dene shynyqtyrý isteri komıtetiniń baspasóz qyzmetiniń habarlasynan belgili boldy, dep habarlaıdy Almaty-akshamy.kz.
Qyrkúıektiń 21 kúni QR Sport jáne dene shynyqtyrý isteri komıtetiniń tóraǵasy Samat Erǵalıev qazaqstandyq sportshy, júzýden Olımpıada chempıony Dmıtrıı Balandın jáne QR Ulttyq quramasynyń bas bapkeri Ilá Gýsakovpen kezdesti.
«Olımpıadany baǵyndyrǵan sportshylar osy baǵyttan alystamaı, Qazaqstandaǵy sporttyń damýyna odan ári úles qosýy kerek. Sportqa endi aıaǵyn basyp kele jatqan jastardyń jattyqtyrýshysy ataný nıetińiz qazaqstandyq sporttyń sizge qanshalyqty mańyzdy ekenin kórsetedi dep sanaımyn. Biz óz tarapymyzdan sizge qoldaý kórsetýge daıynbyz»,- dedi Komıtet basshysy.
Dmıtrıı Balandın - 200 metr qashyqtyqqa júzýden Rıo-de-Janeıro Olımpıada chempıony, Azıa oıyndarynyń 3 dúrkin chempıony, Ýnıversıada-2015 jeńimpazy. 50, 100 jáne 200 metr qashyqtyqta Qazaqstannyń rekordshysy. Júzýden olımpıadalyq altyn medaldi jeńip alǵan tuńǵysh qazaqstandyq.