Aport Mall East oıyn-saýyq ortalyǵynda balalarǵa arnalǵan jan jylýyna toly erekshe shara ótti.
«Balalarǵa qýanysh syıla» atty qaıyrymdylyq jobasy aıasynda ómirlik qıyn jaǵdaıǵa tap bolǵan búldirshinderge arnalǵan is-sharany Qazaqstan halqy Assambleıasy janyndaǵy Analar keńesi uıymdastyrdy. Maqsat – taǵdyr taýqymetin erte sezingen balalardyń júzinde shattyq kúlki oınatyp, olarǵa meıirim men qamqorlyqty sezindirý.
Merekelik keshke Almaty qalasyndaǵy Balalardy qoldaý ortalyǵynyń 48 tárbıelenýshisi qatysty. Balalar úshin bul kún erekshe este qalarlyqtaı bolary sózsiz. Táttiler men shyrynnan dám tatyp, balmuzdaq jep shat-shadyman kúı keshken búldirshinder odan keıin «Halyk IMAX Kinopark 16» kınoteatrynda qyzyqty múltfılm tamashalady.
– Bizdiń maqsat – balalarǵa qýanysh syılaý. Assambleıa janyndaǵy Analar keńesi árdaıym osyndaı ıgi isterge bastamashy bolyp keledi. Bul bizdiń dástúrli sharamyz. Balalarǵa táttiler, balmuzdaq, chıpsy, býrgerler tarattyq. Kınoseanstan keıin de arnaıy as mázirimiz bar, – deıdi Almaty qalasy Qoǵamdyq damý basqarmasynyń ókili, Analar keńesiniń kýratory Balajan Ardabaeva.
Onyń aıtýynsha, Analar keńesi «Chýjıh deteı ne byvaet» jobasy aıasynda da túrli áleýmettik mekemelermen, balalar úıimen baılanysta jumys istep keledi. Búgingi sharaǵa kınoteatr basshylyǵy demeýshilik jasap, balalar úshin esigin aıqara ashty.
Balalarmen birge kelgen №1 arnaıy áleýmettik qyzmetter kórsetetin memlekettik ortalyqtyń pedagog-psıhology Bostangúl Sadırova mundaı sharalardyń tárbıelik ári psıhologıalyq mańyzy zor ekenin aıtty:
– Búgin balalar úshin naǵyz mereke boldy. Kanıkýl ýaqyty bastalǵan soń, lager aıasynda olardy sergitip, qýantqymyz keldi. Bizge jyl saıyn Analar keńesi qoldaý bildiredi. Kınoteatrǵa aparyp, dastarqan jaıyp, balǵyndarǵa qýanysh syılaý – úlken qaıyrymdylyq. Bizdiń ortalyqta túrli statýstaǵy balalar bar – jetimder, ata-anasynyń qamqorlyǵynsyz qalǵandar, nemese otbasynda qıyn jaǵdaıǵa tap bolǵandar. Balalar osynda shamamen 6 aıdaı turady. Keıin olardyń taǵdyry sot arqyly sheshiledi. Ortalyq táýlik boıy jumys isteıdi, balalardy bizge negizinen polısıa men qamqorshylyq organdary alyp keledi, – dedi ol.
Bul shara – tek balalardy qýantýdyń ǵana emes, qoǵamdaǵy jaýapkershilik pen janashyrlyqty arttyrýdyń da kórinisi. Ata-ananyń qamqorlyǵynsyz nemese qıyn jaǵdaıǵa tap bolǵan balanyń ár kúni – synaq. Al osyndaı kúnderi olarǵa meıirim men qamqorlyqty sezindirý – naǵyz azamattyq ustanym. «Balalarǵa qýanysh syıla» jobasy – júrekke jylý syılaǵan bastama retinde este qalary sózsiz.
