Qazaqstan Respýblıkasy Oqý-aǵartý mınıstrliginiń baspasóz qyzmetiniń málimdeýinshe, elimizdegi balalardyń ál-aýqat ındeksiniń turaqty ósimi tirkeldi, dep habarlaıdy aqshamnews.kz
Respýblıkalyq ortasha mán 2,5 pýnktke ósip, 2023 jylǵy 56,1 balmen salystyrǵanda 58,6 baldy qurady.
Segiz óńir ortasha kórsetkishten asyp tústi – 59,4-ten 64,6 balǵa deıin. Kóshbasshy – Aqtóbe oblysy, nátıjesi 64,6 bal, bul ótken jylmen salystyrǵanda 5,6 pýnktke joǵary. Joǵary deńgeıin Pavlodar oblysy da saqtap otyr – 63,3 bal. Aıtarlyqtaı ósim Almaty qalasynda (+6,9) jáne Qostanaı oblysynda (+6,4) baıqaldy.
"Memleket basshysynyń tapsyrmasy boıynsha 2022 jyldan bastap Qazaqstanda Balalar ál-aýqaty ındeksi engizildi. Ol óńirler arasyndaǵy jáne halyqaralyq kórsetkishtermen salystyrýǵa múmkindik beredi, sondaı-aq memlekettiń jáne qoǵamnyń nazaryn balalyq shaq máselelerine aýdarady", – dedi QR Oqý-aǵartý mınıstrliginiń Balalardyń quqyqtaryn qorǵaý komıtetiniń tóraıymy Nasymjan Ospanova.
Indeks tórt baǵyt boıynsha 56 ındıkatordy qamtıdy:
"Bala";
"Otbasy jáne qoǵam";
"Memlekettik saıasat";
"Eldiń ál-aýqaty".
"Ol 35 statısıkalyq jáne 21 saýalnamalyq kórsetkish negizinde qalyptasady, olar balanyń densaýlyǵy men damýyn, otbasylyq jáne áleýmettik ortany, sondaı-aq bilim berý, densaýlyq saqtaý, áleýmettik qorǵaý, ekologıa jáne ınfraqurylym salalaryndaǵy memlekettik saıasattyń tıimdiligin qamtıdy", – delingen habarlamada.