Pedıatrıa ortalyǵynda Balalar kúni atap ótildi
Búgin Pedıatrıa jáne balalar hırýrgıasy ǵylymı ortalyǵynda Halyqaralyq balalardy qorǵaý kúnine oraı, qaterli dertke jáne sırek kezdesetin aýrýlarǵa shaldyqqan balalar úshin «Balbóbek — balapan, jaıshy maǵan alaqan!» atty merekelik shara ótti, dep habarlaıdy Almaty-akshamy.kz.
Aıtýly merekege arnalǵan sharany Pedıatrıa ortalyǵynyń basshysy mindetin atqarýshy Lázat Manjýova ashyp, barsha qaýymdy merekemen quttyqtady. Jazdyń alǵashqy kúnimen tuspa-tus keletin Balalar merekesimen sonymen qatar, «Help Today» qoǵamdyq qorynyń dırektory Elá Alıeva, Jastar saıasaty ortalyǵynyń basshysy Madına Merkeeva men Pedıatrıa ortalyǵynyń №3 onkogematologıa bóliminiń meńgerýshisi Gúlnar Býlabaeva quttyqtap, aqjarma tilekterin bildirdi.
Merekelik shara «Almaty Symphony» Almaty sımfonıalyq orkestriniń konserttik baǵdarlamasymen ashyldy. Álemniń áıgili ánderi men mýzykalyq kompozısıalaryn tartý etken orkestrdiń óneri kópshilikti tánti enti. Merekege elimizge belgili ánshiler Qýanysh Qurmanbaev, Qarlyǵash Myrzageldıeva men «Mýza» dýeti qatysyp, balalarǵa merekelik kóńil-kúı syılady.
Pedıatrıa ortalyǵynyń dárigerleri men meıirbıkeleri dástúr boıynsha bıyl da merekelik fleshmob arqyly quttyqtap, ónerlerimen kishkentaı pasıentterdi qýantty.
Merekede sondaı-aq, klınıkanyń segiz qyrly bir syrly balalary: Symbat Qurmanbek óleń oqysa, Gorohova Arına «Jaz» bıin, Úkibaı Aıajan «Dostyq» bıin naqyshyna keltire bılep, óz ónerlerin pash etti. Kesh sońynda ata-analar atynan sóz sóılegen Baqyt Qojabekov óz alǵysyn bildirip, jyr shashýyn arnady.
Shara barysynda «Balalardyń sýret jáne qolóner kórmesi» qoıyldy. Balalar úshin túrli móltek fılm keıipkerlerimen fotosessıalar uıymdastyryldy. «Omirsulu» jáne «Grotesk» shoý agenttigi uıymynyń eriktileri men anımatorlary búldirshinderdiń kóńilin kóterip, balalarmen birlese túrli oıyndar oınady.
Merekelik shara sońynda «Help Today», «Jańa ómir» qoǵamdyq qory men «Qazaqstannyń isker áıelder qaýymdastyǵy» birlestigi barsha balaǵa syılyqtar men táttiler taratyp, naýqas balalardyń júzderine qýanysh syılady.
Pedıatrıa ortalyǵynda em alyp jatqan barlyq balaǵa zor densaýlyq, mol baqyt, baqytty balalyq shaq, qýanysh pen shattyqqa toly jarqyn ómir tileımiz! Balalar merekesi qutty bolsyn! Aýyr dertke shaldyqqan balalarǵa mereke, qýanysh syılap, aty jaman aýrýdy jeńýge degen senim uıalatýǵa umtylǵan sharanyń psıhologıalyq kómegi zor dep bilemiz.
Bul tarapta merekelik sharaǵa atsalysqan ortalyqtyń barsha tárbıeshileri men psıholog mamandaryna alǵysymyzdy bildiremiz! Olar naýqas balalarǵa ǵana emes, olardyń ata-analaryna da kúndelikti psıhologıalyq qoldaý kórsetip keledi.