Qazaqstan Respýblıkasyndaǵy merekelik kúnderdiń tizbesi «Analar kúni» jáne «Ákeler kúni» merekelerimen tolyqty.
Bul bastamany Aqparat jáne qoǵamdyq damý mınıstrligi qolǵa aldy, dep habarlaıdy Almaty-akshamy.kz.
Endi «Analar kúni» merekesi mamyr aıynyń ekinshi jeksenbisinde, «Ákeler kúni» merekesi maýsymnyń úshinshi jeksenbisinde aýqymdy túrde atap ótiledi.
Qazaqstanda merekelik kúnder kúntizbesin bekitý týraly qaýlyǵa tolyqtyrý engizildi. Qujatqa Úkimet basshysy Álıhan Smaıylov qol qoıdy.
«Halqymyzdyń «Otan otbasynan bastalady» degen naqyl sóziniń máni tereńde jatsa kerek. Memleket basshysy Qasym-Jomart Toqaev: «Berekeli ári baqytty otbasy qýatty eldiń tiregi», – degeni belgili. Otbasyn nyǵaıtatyn faktorlardyń biri – áýlet músheleriniń birge ýaqyt ótkizýi, ortaq qýanyshty birge atap ótýi ekeni anyq. Mınıstrlikke qarasty Qazaqstandyq qoǵamdyq damý ınstıtýtynyń «Qazaqstandyq otbasylar» ulttyq baıandamasynda kórsetilgendeı, elimizdegi otbasylyq dástúrlerdiń dińgegi – áýlet músheleriniń týǵan kúnin atap ótý eken. Bul saýalnamaǵa qatysqan 86%-dan astam respondenttiń oı-pikiri eskerildi. Sondaı-aq otbasylardyń jartysynan kóbi Jańa jyl, 8 naýryz, 22 naýryz jáne taǵy basqa memlekettik merekelerdi ataǵan», dep jazdy mınıstr.
Qýanyshty jańalyqty bólisken mınıstr jańa merekeler otbasy ınstıtýtyn nyǵaıtýǵa, analarymyz ben ákelerimizdiń mártebesin kóterýge, otbasylyq qundylyqtardy damytýǵa, áýlettegi jaqyndyqtyń, qurmet-yqylastyń berik ornaýyna jáne otbasyndaǵy bereke-birliktiń artýyna yqpal etetinine senim bildirdi.
«Búgingi Balalar quqyǵyn qorǵaý kúninde paıda bolǵan máni zor merekeler qutty bolsyn! Ákelerimiz ben analarymyz aman bolsyn!», dep qorytyndylady Darhan Qydyráli.