Almaty qalasynda «Taza Qazaqstan» respýblıkalyq aksıasy aıasynda erekshe ekologıalyq-shyǵarmashylyq bastama – «Eko-shyrsha Almaty» atty ashyq baıqaý jarıalandy. Joba Almaty qalasy ákimdiginiń qoldaýymen iske asyrylyp otyr.
Bul baıqaý qalalyq ortada ekologıalyq sanany kóterýdi, shyǵarmashylyq áleýetti arttyrýdy jáne jańa jyldyq merekelerdi jaýapkershilikpen atap ótýge baǵyttalǵan jańa mádenı dástúr qalyptastyrýdy kózdeıdi, - dep habarlaıdy Aqshamnews.kz.
Baıqaý ekodızaın baǵytyndaǵy shyǵarmashylyqty qoldap, megapolıstiń ekologıalyq mádenıetin arttyrýdy jáne turmystyq qaldyqtardy qaıta qoldaný ıdeıasyn keńinen nasıhattaýdy maqsat etedi. Bul bastamanyń túpki máni – tutynýshylyq mádenıetin qaıta qarastyryp, turmystyq qaldyqtarǵa jańa ómir syılaý arqyly qoǵamdaǵy ekologıalyq oılaýdy damytý. Osy maqsatta qatysýshylarǵa qaıta óńdeletin materıaldar men turmystyq qaldyqtardy paıdalana otyryp, Almatynyń rýhyn, dınamıkasyn jáne zamanaýı kelbetin beıneleıtin erekshe art-shyrsha jasaý usynylady.
Uıymdastyrýshylardyń aıtýynsha, qala ákimdiginiń jobalyq keńsesiniń qoldaýymen júzege asyrylyp jatqan bul jańa bastama Almatyda ekologıalyq turǵydan taza ári shyǵarmashylyqqa negizdelgen jańa jyldyq merekelik dástúr qalyptastyrýǵa baǵyttalǵan. Atalǵan bastama sýretshilerdi, dızaınerlerdi jáne qalanyń bolashaǵyna beıjaı qaramaıtyn barlyq qala turǵyndaryn biriktirýdi kózdeıdi. Olardyń pikirinshe, usynylatyn eko-shyrshalar – jaı ǵana óner týyndysy emes, zamanaýı turaqty qalanyń qandaı bolýy kerektigin aıqyndaıtyn mańyzdy manıfes.
Baıqaýǵa shyǵarmashylyq pen ekobelsendilikke beıim barlyq azamattar qatysa alady. Atap aıtqanda, sýretshiler, dızaınerler, sáýletshiler, qolónershiler, shyǵarmashylyq toptar, ekologıalyq qaýymdastyqtar.
Árbir qatysýshy bıiktigi 2-2,5 metr aralyǵyndaǵy, tek turmystyq qaldyqtar, qaıta óńdeletin materıaldar, ekinshi rettik shıkizat qoldanylǵan art-shyrsha jobasyn daıyndaýy tıis. Materıaldy tańdaýda erkindik berilgenimen, ekologıalyq qaýipsizdik jáne qaıta paıdalanýǵa jaramdylyq basty krıterııler bolyp esepteledi.
Qatysýshylardy yntalandyrý maqsatynda baıqaý aıasynda qarjylaı qoldaý qarastyrylǵan:
● Alǵashqy irikteýden ótken 15 fınalıstke óz jobasyn júzege asyrý úshin 100 000 teńge kóleminde grant beriledi;
● Fınaldyq kezeńde úzdik dep tanylǵan avtorlar
✔ I oryn – 400 000 teńge
✔ II oryn – 300 000 teńge
✔ III oryn – 200 000 teńge kóleminde aqshalaı syılyqtarǵa ıe bolady.
Sonymen qatar, 6 avtorǵa árqaısysyna 100 000 teńge kóleminde arnaıy yntalandyrý syılyǵy bolady.
Bul syılyqtar jas talanttardy qoldaýǵa, ekodızaın salasynda jańa ıdeıalardyń paıda bolýyna jáne shyǵarmashylyq básekelestikti arttyrýǵa baǵyttalǵan.
Baıqaý qorytyndysy boıynsha eń úzdik eko-shyrshalar qalalyq festıváldiń art-alleıasynda kópshilik nazaryna usynylady. Festıvál kezinde qala turǵyndary men qonaqtary erekshe óner týyndylarymen tanysyp qana qoımaı, ekologıalyq mádenıetke qatysty paıdaly aqparat alyp, turaqty damý ıdeıalaryna jaqyndaı túsedi.
Shyǵarmalardy baǵalaýmen arnaıy shyǵarmashylyq ındýstrıa ókilderinen, ekodızaın salasynyń mamandarynan, ekologtardan, seriktes uıymdardyń ókilderinen jáne tanymal dızaınerlerden qurylǵan kásibı qazylar alqasy aınalysady.
Olar jumystardy kompozısıa, ıdeıanyń jańashyldyǵy, qoldanylǵan materıaldardyń ekologıalyq sıpaty, kórkemdik sheshimi jáne qalalyq keńistikke sáıkestigi boıynsha baǵalaıdy.
Bul bastama qalanyń shyǵarmashylyq áleýetin ashýǵa, jas talanttardy qoldaýǵa, sondaı-aq Almatyny Qazaqstandaǵy jasyl ınovasıalar ortalyǵyna aınaldyrýǵa baǵyttalǵan qadamdardyń biri.
Baıqaýǵa ótinimder 18 jeltoqsanǵa deıin qabyldanady. Tolyq aqparat pen baıqaýǵa qatysý erejelerimen tómende kórsetilgen silteme arqyly tanysýǵa bolady.
https://docs.google.com/document/d/1jeMoWCcg3PBdnnzLdPSH5jRQbu_88czB/edit?usp=drivesdk&ouid=110611780211072053156&rtpof=true&sd=true