Balalar ádebıeti jyly aıasynda memlekettik tapsyryspen jaryqqa shyqqan 40 kitaptyń tusaýkeseri ótti
Bıyl Balalar ádebıetiniń jyly bolyp belgilengen edi. Endi balalar ádebıetin qoldaý 2023 jylǵa deıin sozylady. Bıyl qazaq ádebıetinde erekshe jańalyq boldy. 168 atalymmen 492 myń dana kitap basyp shyǵarylyp, respýblıkanyń memlekettik kitaphanalaryna tegin taratyldy. Onyń 40-y balalar ádebıetine arnalǵan. Jalpy taralymy 120 myń dana, dep habarlaıdy Almaty-akshamy.kz 24.kz-ke silteme jasap.
«Arnaıy logotıppen jalpy taralymy 120 myń danada basylyp shyǵyp, elimizdiń búkil kitaphanalaryna, búkil aımaqtaryna taratyldy. Basylyp shyqqan ádebıetterdiń 34-i otandyq qalamgerlerdiń shyǵarmasy bolsa, altaýy – álem balalar ádebıetiniń aýdarmalary. Osyndaı oń bastamany jalǵastyrý maqsatynda balalar men jasóspirimderdiń kitap oqýyn qoldaý jylyn 2023 jylǵa deıin jalǵastyrý týraly sheshim qabyldandy. Osyndaı ıgi shara barshańyzǵa qutty bolsyn», - dedi QR Mádenıet jáne sport mınıstri Aqtoty Raıymqulova.
Kitaptardyń ishinde balalar men jasóspirimderge arnalǵan otandyq shyǵarmalar jaryq kórdi: «Adamnyń bir qyzyǵy bala degen...», «Balalyqtyń sońǵy kúzi», «Uly dalanyń ulandary», «Sábı bolǵym keledi», taǵy basqa týyndylar bar.
Sondaı-aq álem balalar ádebıeti avtorlarynyń qazaq tilindegi aýdarmalary jaryq kórdi. Sonyń ishinde japon balalar ádebıeti jas oqyrmandar úshin qyzyqty ári tyń shyǵarma ekenin atap ótýge bolady. «Kók bóriniń kózi; Kastrúchınniń «Erjúrek qumyrsqa», «Qazyna araly», Danıel Defonyń "Robınzon Krýzo" shyǵarmalary qazaqshalandy.