Sonymen birge tárbıeshige de qatań talaptar qoıylady.
Bilim jáne ǵylym mınıstrligi aıyna 130 myń teńge tóleıtin balabaqshanyń birinde aýtızmge shaldyqqan balalardy uryp-soqqannan keıin talaptardy qatańdatýdy josparlap otyr, dep habarlaıdy Almaty-akshamy.kz
Vıse-mınıstr Sholpan Karınovanyń aıtýynsha, qazir balabaqshada tekserý jalǵasyp jatyr. Tekserý aıaqtalǵannan keıin sáıkes shara qabyldanady.
«Mınıstrlik bul óte kúrdeli jaǵdaı ekenin moıyndap otyr. Mundaı jaǵdaı qaıtalanbaýy kerek. Sondyqtan qazir biz balabaqshalarǵa qoıylatyn talaptardy kúsheıtý sharalaryn qarastyryp jatyrmyz. Sonymen qatar balabaqshamen birge tárbıeshilerge qoıylatyn talaptar da qatańdatylady. Balabaqshalardy tekserý tártibin ózgertýdi josparlap otyrmyz. Balabaqshalarǵa lısenzıa berýdi qaıtarý qajet bolatyn syńaıly», - dedi Karınova.
Vıse-mınıstr qazir talaptardy kúsheıtý normalary bilim berý mekemeleri jáne pedagogtarmen talqylanyp jatqanyn aıtty.
7 sáýirde jelide damý ereksheligi bar balabaqsha tárbıelenýshilerine qyzmetkerler kúsh kórsetken vıdeo paıda boldy. Inklúzıvti balabaqsha quny bir bala úshin aıyna 130 myń teńgeni quraıdy, al qosymsha sabaq úshin ata-analar 200 myń teńge tóleıdi. Balasyna qalaı qaraıtynyn bilgen soń, ata-analar balalaryn alyp ketip, polısıaǵa shaǵymdandy.