Muny tek eresekterdiń kómegimen sheshýge bolady
Balalar psıhology, mektepterdegi daǵdarystyq jaǵdaılardy sheshý jónindegi maman Anastasıa Steblánko bala mektepte nemese áleýmettik jelide býllıngke ushyrasa ne isteý kerektigin aıtty, dep habarlaıdy Almaty-akshamy.kz.
Mektep balanyń ómirinde mańyzdy ról atqarady, sebebi býllıng jaǵdaılaryn mektep qabyrǵasynan baıqaımyz. Býllıng máselesin sheshýde kóptegen mektepter mamandandyrylǵan ortalyqtardyń, ÚEU-nyń kómegine júginedi.
«Men balalar psıhologymyn. Maǵan ata-analar, muǵalimder jıi kómekke júginedi. Men býllıng pen konflıkt máselelerin tolyq ajyrata bilgende, kóptegen mektepter nazar aýdara bastady. Aldyńǵy qatarda jekemenshik mektepter bolatyn. Alaıda, qazir memlekettik mektepter de kómek surap júgine bastady, – dedi A.Steblánko.
Eger mektepte býllıng máselesi anyqtalsa, ol aldymen synyp jetekshisiniń, odan soń mektep psıhology, al odan keıin tárbıe jónindegi dırektor orynbasarynyń dárejesinde sheshiledi. Máseleniń sheshimi bolmaǵan jaǵdaıda quqyq qorǵaý organdary iske kirisedi.
Áleýmettik jelilerdiń damýymen birge kıberbýllıng máselesi de paıda boldy. Sarapshy bul máseleniń ózindik núanstary baryn jáne onyń ádettegi býllıng uǵymynan basqasha ekendigin atap ótti. Ádette kıberbýllıngtiń aldyn alý, jaǵdaıdy sheshý ońaı sharýa emes. Sebebi, eger mektepte ákimshilik, ata-analar nemese jaýapkershilikke tartylatyn adamdar bolsa, onda kıberbýllıng jaǵdaıynda másele qıyn. Degenmen máseleniń qashan da sheshimi tabylady, - deıdi sarapshy.
"Eger bala mektepte nemese áleýmettik jelide býllıngke ushyrasa ne isteý kerek? Men qarapaıym, biraq nátıjesi bar erejelermen bóliskim keledi. Jalpy, býllıng jaǵdaıyn balalar ózdiginen sheshe almaıdy. Muny tek eresekterdiń kómegimen sheshýge bolady. Sondyqtan bala býllıngke ushyraǵan jaǵdaıda ózi sene alatyn eresek adamǵa jaǵdaıdy ashyp aıtyp, ol adamnan qoldaý tabýy óte mańyzdy", - dep bólisti ol.
Psıholog ata-analarǵa balalarmen sóılesýge jáne olardy tyńdaýǵa kúndelikti 15 mınýt ýaqyttyń jetkilikti ekenin aıtty. Sarapshynyń pikirinshe, mundaı áńgimeler profılaktıkalyq sıpatqa ıe jáne balaǵa ishteı senimdilik pen kúsh beredi.