Bakýdegi Túrki saýda ortalyǵynda Qazaqstannyń Ázirbaıjandaǵy Elshiliginiń uıymdastyrýymen Qazaqstannyń saýda pavılonynyń saltanatty ashylýy ótti, dep habarlaıdy aqshamnews.kz
İs-sharaǵa Qazaqstannyń Ázirbaıjandaǵy Elshisi Álim Baıel, Qyrǵyzstan men Túrikmenstan Elshileri, Ázirbaıjannyń shaǵyn jáne orta bıznesti damytý agenttiginiń (KOBIA) tóraǵasy Orhan Mamedov, Qazaqstan-Ázirbaıjan İskerlik keńesiniń teń tóraǵasy Dáýren Bımov, Túrki saýda ortalyǵynyń dırektory Iylmaz Okýklý, Parlament depýtattary men jýrnalıser qatysty.
Elshi Á. Baıel óz sózinde: «Búginde jahandyq geosaıası jáne geoekonomıkalyq transformasıa jaǵdaıynda óńirimizdiń róliniń artyp kele jatqanyn kórip otyrmyz. Túrki álemi halyqaralyq arenada mańyzdy oıynshy bola alady jáne bolýǵa tıis. Árıne, kez kelgen odaq, kez kelgen ıntegrasıa berik ekonomıkalyq irgetasqa negizdelýi kerek. Osy turǵydan alǵanda, mundaı bastamalar óte qýantady. Onyń ústine, olar tómennen joǵary qaraı damýda — ıaǵnı kóbinese bizdiń kásipkerlerdiń usynystary negizinde jáne tıisti qurylymdardyń qoldaýy arqasynda», – dedi.
Túrki saýda ortalyǵy TMU elderiniń kásipkerlerine óz ónimderin tanystyrý, iskerlik baılanys ornatý jáne halyqaralyq naryqtarǵa shyǵý úshin turaqty alań usynady. Pavılondar TMU elderiniń ulttyq taýarlaryn, qolóner buıymdaryn jáne gastronomıasyn pash etetin mádenıet jáne saýda alańdary retinde qurylǵan. Ár eldiń mádenıetin kórsetetin dástúrli dızaın men atmosferaǵa erekshe kóńil bólingen.
O. Mamedov atalǵan saýda alańdarynyń túrki elderi arasyndaǵy ekonomıkalyq yntymaqtastyq jáne taýarlar men qyzmetter almasýdaǵy mańyzdylyǵyn atap ótti. Kásipker D. Bımov osy bastama berip otyrǵan múmkindikterge nazar aýdaryp, ádette kásipkerler eńserýi kerek kedergilerdiń kóp bóligi budan ári saýda pavılondary arqyly retteletinin aıtty.
İs-shara barysynda túrki halyqtarynyń dástúrli taǵamdary usynylǵan ulttyq sarynda bezendirilgen kıiz úıler de tanystyryldy.
Sonymen qatar, atalǵan is-shara aıasyndaǵy konserttik baǵdarlamada qazaq bilimgerleriniń oryndaýyndaǵy Nurǵısa Tilendıevtiń shyǵarmalary men kórnekti kompozıtordyń 100 jyldyǵyna arnalǵan prezentasıa usynyldy.