Qazaqstandyq delegasıa Qorǵanys mınıstri general-polkovnık Rýslan Jaqsylyqovtyń basshylyǵymen Baký qalasyna keldi.
Dástúr boıynsha sapar Qurmetti jerleý aleıasyna barýdan bastaldy. Qazaqstan Qorǵanys mınıstri Ázerbaıjannyń jalpyulttyq kóshbasshysy Geıdar Álıevtiń beıiti men «Shahıdter aleıasy» memorıaldyq keshenine gúl shoqtaryn qoıý rásimine qatysty, dep habarlaıdy Allmaty-akshamy.kz Qorǵanys mınıstrdigine silteme jasap.
Resmı sapar aıasynda general-polkovnık Rýslan Jaqsylyqov ázerbaıjandyq áriptesi general-polkovnık Zakır Gasanovpen kezdesti. Qazaqstandyq delegasıa quramynda kelissózderge Qazaqstan Respýblıkasynyń Ázerbaıjandaǵy Tótenshe jáne Ókiletti Elshisi Álim Baıel qatysty.
Qazaqstan men Ázerbaıjan Qorǵanys mınıstrleri ózara is-qımyldyń aǵymdaǵy jáne perspektıvalyq baǵyttaryn talqylady. Kezdesý qorytyndysy boıynsha taraptar áskerı yntymaqtastyq salasyndaǵy úkimetaralyq kelisimge qol qoıdy. Kezdesý barysynda qorǵanys vedomstvolarynyń basshylary Qazaqstanda ótkizý josparlanyp otyrǵan óńirdegi qaýip-qaterlerge den qoıý kezinde ózara is-qımyl máselelerin pysyqtaýǵa múmkindik beretin «Birlestik-2024» kópultty oqý-jattyǵýynyń ózektiligin atap ótti.
Taraptar sondaı-aq jaýyngerlik daıyndyq, áskerı bilim berý, áskerı-tehnıkalyq yntymaqtastyq jáne basqa da ózara qyzyǵýshylyq týdyratyn salalardaǵy yntymaqtastyqtyń áleýetin áńgime etti.