Sıfrlyq kitaphana
Dıplomatıalyq qarym-qatynastyń ornaǵanyna 30 jyl tolýyna oraı Qazaqstan Elshiligi Fatalı Ahýndov atyndaǵy Ázirbaıjan ulttyq kitaphanasymen birlesip, qazaq qalamgerleri eńbekteriniń ázirbaıjan tilindegi sıfrlyq kitaphanasynyń tusaýkeserin ótkizdi, dep habarlaıdy Almaty-akshamy.kz QazAqparatqa silteme jasap.
İs-sharaǵa Jazýshylar odaǵynyń hatshysy, Ázirbaıjannyń halyq jazýshysy Chıngız Abdýllaev, Túrki mádenıeti men murasy halyqaralyq qorynyń prezıdenti Gúnaı Efendıeva, «Ázirbaıjan-Qazaqstan» respýblıkalyq dostyq qoǵamynyń prezıdenti Eldar Gúnaıdyn, Ázirbaıjannyń ádebı toptary men zıaly qaýymynyń kórnekti ókilderi qatysty.
Eki el arasyndaǵy yntymaqtastyqtyń uzaq jyldary ishinde ártúrli ýaqytta ázerbaıjan tiline aýdarylǵan qazaq oıshyldarynyń, jazýshylar men aqyndarynyń baı kitap qory jınalyp, olardyń shyǵarmalary jaqynda elshiliktiń bastamasymen sıfrlandyryldy.
Olar - Abaıdyń, Jambyl Jabaevtyń, Maǵjan Jumabaevtyń, Muhtar Áýezovtiń, Qalıjan Bekhojınniń, Saparǵalı Begalınniń, Qadyr Myrzalıevtiń, Oljas Súleımenovtiń, Rollan Seısembaevtiń, Muhtar Shahanovtyń, Sábıt Dosanovtyń, Nemat Kelimbetovtiń, Joltaı Jumattyń, Sherhan Murtazanyń, Ǵalym Mutanovtyń, Berik Shahanovtyń, Qazybek Shahanovtyń, Baqytjan Qanapıanovtyń jáne Ulyqbek Esdáýlettiń shyǵarmalary.
Sıfrlyq kitaphanaǵa Jambyl Jabaevtyń 1939 jylǵy «Laıla» shyǵarmasynan bastap, qazirgi zamanǵy jazýshylardyń eńbekterine deıingi basylymdardyń 50-ge jýyq elektrondyq nusqasy endi.
Sıfrlanǵan shyǵarmalardyń ishinde Fırýza Agaeva, Fatıma Dýrsýnova, Aıda Eıvazova, Elhan Zala Karahanly, Akıf Ahmedly, Ibragım Ilásly, Ramız Askerov, Elman Gýlıev, Teımýr Týran, Nızamı Mamedov-Tagısoı, Narıman Abdýlrahmanly jáne basqa da ázirbaıjan aqyn men jazýshy-aýdarmashylardyń tárjimeleri bar.
Óz sózinde Qazaqstan Elshisi Serjan Ábdikárimov osyndaı jobalardy iske asyrý arqyly nyǵaıa beretin baýyrlas eki el men halyqtardyń tarıhı tyǵyz mádenı-gýmanıtarlyq, ádebı jáne adamı baılanystaryn atap ótti.
Aqparattyq keńistikte ashyq sıfrlyq kitaphanany qurý ony shynymen halyqtyq, barlyǵyna qoljetimdi etedi.
Osy elektrondy resýrs eki túrki halyqtarynyń búgingi jáne bolashaq urpaqtarynyń mádenı ózara baıytylýy men rýhanı jaqyndasýyn kúsheıtetinine senim bildirdi.
Óz kezeginde, kitaphana dırektory Kerım Tahırov qazaq jazýshylarynyń eńbekterin sıfrlyq formatqa kóshirý jáne olardy bolashaq urpaqqa tapsyrý arqyly saqtaýdyń mańyzdylyǵyn atap ótti. Ol sıfrlandyrý men joǵary tehnologıalar ǵasyrynda elektrondy kitaphanalar ashyq qoljetimdilikke, ýaqyt pen qarajatty únemdeýge baılanysty oqyrmandar arasynda úlken tanymaldylyqqa ıe ekenin atap ótti.
«Aımaqtardaǵy oqyrmandar alys bolǵandyqtan Baký qalasynyń kitaphanalaryna kire almaıdy. Elektrondyq kitaptar - bilim berý men bos ýaqytty ótkizý prosesinde yńǵaıly ǵana emes, sonymen qatar óz pikirlerińizdi ınternette bólisý múmkindigi», – dep atap ótti ol.
Tanystyrylymǵa qatysýshylar Qazaqstanmen kópjyldyq yntymaqtastyq týraly aıtyp, ózara túsinistik pen dostyqty nyǵaıtýǵa, qazaq ádebıetin Ázerbaıjanda tanymal etýge jáne eki baýyrlas halyqtyń birligine baǵyttalǵan osy gýmanıtarlyq-bilim berý jobasynyń mańyzy men jańashyldyǵyn atap ótti.
Qazaqstannyń Bakýdaǵy Elshiligi saıtynyń «Paıdaly materıaldar» bóliminde ázerbaıjan tilinde «Elektrondyq kitaphana» atty taqyryptyq blok bar. Jaqyn arada ol M.F.Ahýndov atyndaǵy Ázirbaıjan ulttyq kitaphanasynyń saıtynda da qoljetimdi bolady.