Qazaqstan Respýblıkasynyń Elshiligi Ázerbaıjannyń Halyqaralyq qatynastardy taldaý ortalyǵymen (HQTO) birge «Ádiletti Qazaqstannyń ekonomıkalyq baǵdary» atty Prezıdent Q. Toqaevtyń Joldaýyn talqylaýǵa arnalǵan dóńgelek ústel ótkizdi.
İs-sharaǵa Qazaqstannyń Ázerbaıjandaǵy Elshisi Álim Baıel, HQTO tóraǵasy Elshi Farıd Shafıev, Ázerbaıjan Mıllı Májilisiniń depýtaty Rasım Mýsabekov, dıplomattar, Ázerbaıjannyń saıasattaný, halyqaralyq qatynastar jáne ekonomıka salasyndaǵy jetekshi sarapshylary, sondaı-aq BAQ ókilderi qatysty. Kezdesýde Qazaqstan Respýblıkasy Parlamenti Májilisiniń depýtaty, Qazaqstan men Ázerbaıjan parlamentaralyq yntymaqtastyq tobynyń jetekshisi Aıdos Sarym jáne Ázerbaıjannyń Qazaqstandaǵy Elshisi Agalar Atamoglanov beınekonferens baılanys arqyly qosylyp, sóz sóıledi, dep habarlaıdy almaty-akshamy.kz.
Ázerbaıjannyń jetekshi taldaý ortalyǵy sanalatyn HQTO-da ótken dóńgelek ústel barysynda qatysýshylar ekijaqty yntymaqtastyqtyń jaǵdaıy men perspektıvalaryn, óńirdegi ahýaldy, sondaı-aq Qazaqstan Respýblıkasy Prezıdenti Joldaýynyń negizgi aspektilerin talqylady.
Elshi Á.Baıel óz sózinde Memleket basshylarynyń senimdi dıalogynyń arqasynda qazaq-ázerbaıjan qatynastarynyń jańa deńgeıge kóterilgenin atap ótti. Buǵan sońǵy tórt aıda Qazaqstannan Ázerbaıjanǵa Májilis Tóraǵasy, Senat Tóraǵasynyń orynbasary, Premer-Mınıstr, Konstıtýsıalyq Sot Tóraǵasy, Mádenıet, Kólik jáne Tótenshe jaǵdaılar mınıstrleri deńgeıindegi delegasıalardyń kelgeni dálel bolyp otyr.
Á.Baıel Joldaýdyń Qazaqstan úshin ǵana emes, búkil óńir úshin de mańyzdylyǵyna nazar aýdardy. Atap aıtqanda, Joldaýda kólik-logıstıkalyq yntymaqtastyq jáne THKB-ny (Orta dáliz) damytý máseleleri qozǵalǵan.
«Qazaqstanǵa kúshti jáne turaqty Ázerbaıjan, al Ázerbaıjanǵa yqpaldy jáne baqýatty Qazaqstan kerek», - dep túıindedi dıplomat.
HQTO tóraǵasy Farıd Shafıev Qazaqstandaǵy ishki saıası prosesterge oń baǵa berip, Transkaspıı halyqaralyq kólik baǵytyn damytý máselesine kóńil bólý deńgeıine qýanatyndyǵyn bildirdi.
Májilis depýtaty A. Sarym óz sózinde qorǵanys jáne qaýipsizdik salasyndaǵy yntymaqtastyq máselelerin qozǵady.
«Qazaqstan Ázerbaıjannyń áskerı-tehnıkalyq saladaǵy tájirıbesin zertteýde. Taǵy bir mańyzdy másele – túrki yntymaqtastyǵyn damytý. Biz damytýymyz kerek jaqsy formattar bar», - dep aıtty májilismen.
Mıllı Májilis depýtaty R. Musabekov Qazaqstan men Ázerbaıjannyń Kaspıı teńiziniń quqyqtyq mártebesin aıqyndaý prosesine qosqan sheshýshi úlesin tilge tıek etti. Ol túrki elderiniń mádenı-gýmanıtarlyq jaqyndasýyn da atap ótti.
Jalpy, Ázerbaıjan sarapshylary Qazaqstan Prezıdenti Joldaýynyń mańyzdylyǵyn joǵary baǵalap, onda naqty jáne aýqymdy maqsattar kórsetilgenin atap ótti.
«Q.Toqaevtyń Joldaýy óte pragmatıkalyq sıpatqa ıe, onda uzaq merzimdi qıalı maqsattar joq», – dep Ázerbaıjan Prezıdenti janyndaǵy Memlekettik basqarý akademıasynyń oqytýshysy Zaýr Mamedov málimdedi.
