QR Premer-Mınıstri Álıhan Smaıylov «Báıterek» ulttyq basqarýshy holdıńiniń ujymyna jańa basshy Nurlan Baıbazarovty tanystyrdy.
Nurlan Baıbazarov memlekettik qyzmette de, kvazımemlekettik sektorda da jaýapty qyzmetter atqardy. Atap aıtqanda, qarjy jáne ulttyq ekonomıka mınıstrlikterinde, «Qazaqstan temir joly» jáne «QazMunaıGaz» ulttyq kompanıalarynda, Ónerkásipti damytý qorynda jumys istedi. Byltyrǵy qarashadan bastap ol Qazaqstan damý bankinde basqarma tóraǵasy boldy, dep habarlaıdy Almaty-akshamy.kz Primeminister.kz saıtyna silteme jasap.
Álıhan Smaıylov Memleket basshysy halyqqa Joldaýynda «Báıterek» holdıńiniń qyzmetin transformasıalaý jáne aýqymdy sıfrlandyrý boıynsha mindet qoıǵanyn eske saldy.
«Nátıjesinde búrokratıalyq kedergiler joıylyp, ótinimderdi qaraý merzimi qysqaryp, bıznes qaýymdastyǵynyń qoldaý sharalary týraly habardar bolý deńgeıi artýy qajet. Jańa basshy aldaǵy josparlardyń oryndalýyn qamtamasyz etýi tıis», — dedi Premer-Mınıstr.
Sonymen qatar ol «Báıterek» básekege qabiletti bıznesti damytý, halyqty qoljetimdi baspanamen qamtamasyz etý jáne respýblıkanyń azyq-túlik qaýipsizdigin nyǵaıtý boıynsha jumystardy kúsheıtýi qajet dep atap ótti.
Qorytyndylaı kele, Premer-Mınıstr holdıń ujymyna júktelgen barlyq mindetterdi sheshýde tabysty jumys tiledi.