Prezıdent memleket retteıtin baǵalardy belgileý kezindegi jemqorlyqty joıýdy tapsyrdy
Bul týraly QR Prezıdenti Qasym-Jomart Toqaevtyń sybaılas jemqorlyqqa qarsy is-qımyl jónindegi keńeste sóılegen sózinde aıtty, dep habarlaıdy Almaty-akshamy.kz QazAqparatqa silteme jasap.
«Byltyr elimizde baǵa kúrt kóterildi. Árıne, álemniń barlyq memleketinde ınflásıa deńgeıi joǵary boldy. Degenmen, tıisti ýákiletti organdar baǵany belgilegen kezde, onyń qanshalyqty negizdi ekenin muqıat qaraýy kerek. Munyń astarynda ekonomıkalyq sebepten bólek, bireýdiń jymysqy áreketi jatqan joq pa degen saýal týyndaıdy.
Mysaly, otandyq ónim óndirýshiler temirjol salasyn jemqorlyq jaılaǵanyn aıtyp, únemi shaǵymdanady. Kásipkerler naqty bir nysanǵa aparatyn temirjoldy paıdalanǵany úshin tóleıtin aqynyń kólemine baılanysty narazylyq bildirýde. Osyǵan oraı, bir ýaqytta birneshe óńirden – Qostanaı, Shyǵys Qazaqstan, Túrkistan, Aqmola jáne Pavlodar oblystarynan aryz túsken. Monopolıs kompanıalar baǵany óz betimen eselep ósirgen. Bul halyq tutynatyn taýarlardyń baǵasyna birden áser etedi. Men bir jyl buryn Básekelestikti qorǵaý agenttigine Bas prokýratýramen birlesip, osy máselemen aınalysýdy tapsyrdym.
Biraq, «Baıaǵy jartas – bir jartas» kúıinde qaldy. Keıbir adamdardyń tutynýshy men kásipkerdiń esebinen ǵana paıda taýyp otyrýy durys emes. Prezıdent Ákimshiligine bul máseleni baqylaýǵa alýdy tapsyramyn. Monopolıserdiń zańsyz tapqan tabysyn qaıtaryp, atqarylǵan jumystar jóninde maǵan baıandańyzdar. Óz paıdasy úshin ózgelermen sybaılasqan sheneýnikter bar ma, sony da anyqtaý kerek. Jalpy, baǵany qoldan ósirýge múldem jol bermeý qajet», - dedi Memleket basshysy.