Qazaqstandyq Bahtıer Zaınýtdınov óner kórsetetin "Beshıktash" komandasy Túrkıa chempıonatynda "Trabzonspor" klýbynan oısyrata jeńildi.
Kezdesý 3:0 esebimen aıaqtaldy, dep habarlaıdy Almaty-akshamy.kz Sports.kz-ke silteme jasap.
"Beshıktash" qonaqta ótkizgen kezdesýde óz qaqpasyna úsh gol jiberip aldy. Alań ıeleri sapynan esepti Pol Onýachý (29-mınýt) ashty. Artynan Anastasıos Bakasetas (41-mınýt) pen Edın Vıshcha (61-mınýt) esepti eseleı tústi. Aıta keterligi, qos komanda arasynda naǵyz favorıt retinde "Beshıktash" sanalǵan bolatyn.
Stambýldyq klýb osy jyldyń aqpan aıynan beri jeńilis tappaı kele jatqan. Qazaqstandyq jartylaı qorǵaýshy Bahtıer Zaınýtdınov oıynǵa tek 80 mınýtta qosyldy. "Beshıktash" osy maýsymda ótkizgen tórt machtan keıin jeti upaı ıelenip, týrnırlik kestede toǵyzynshy orynda tur. Qarsylasy "Trabzonspor" bolsa, bes oıynnan keıin toǵyz upaımen tórtinshi orynda kele jatyr.