Aqparattyq tehnologıalar salasynda arýlardyń kóbeıip kele jatqany qýantady
QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın áıelder qaýymyn 8 naýryz merekesimen quttyqtady, dep habarlaıdy Almaty-akshamy.kz.
«Qymbatty arýlar, sizderdi 8 naýryz - Halyqaralyq áıelder kúnimen quttyqtaımyn! Búgingi tańda qazaqstandyq arýlar - otbasynyń uıytqysy, oshaqtyń berekesi ǵana emes, kareralyq jetistikterge jetip, bızneste bıik belesti baǵyndyryp, elimizdiń egemendigin eńseli etýge zor úles qosyp jatqan belsendi tulǵa. Er-azamattarǵa senim artyp, abyroı-ataqqa jetý jolynda únemi qoldaý kórsetip, tózimdilik pen danalyqtyń sımvolyna aınalǵan áıelder qaýymyna alǵysym sheksiz. Bizdiń mınıstrlikke qarasty salalarda kezinde kóbine er kisiler qyzmet etse, qazirgi tańda aeroǵarysh ónerkásibi, telekomýnıkasıa, ınovasıa, geodezıa jáne kartografıa salasynda qyz-kelinshekterdiń de qatary artyp keledi. Al «Azamattarǵa arnalǵan úkimet» pen İT-salada áıelder qaýymy basym desek te bolady. Muny jýyrda Astana Hub-ta saýatty spıkerler men óz isiniń sheberleri jınalǵan Techno Women forýmynan da baıqaýǵa bolady. Osyndaı zamanaýı salalarda básekege qabiletti arýlardyń kóbeıip kele jatqandyǵy keremet emes pe?! Densaýlyqtaryńyz myqty, baqyttaryńyz baıandy bolsyn!»,- dep jazdy mınıstr óziniń Facebook paraqshasynda.