Qazaqstanda keıbir bazar basshylary saýdagerlerge jeke talaptaryn qoıyp, baǵany ózderi qoıatyny anyqtaldy, dep habarlaıdy almaty-akshamy.kz
«Elimizde bólshek saýdaǵa baqylaý biraz jyldardan beri júrgizilmeı keledi. Sonymen qatar naryqtaǵy saýda ústemaqysyna da baqylaý joq. Onyń ústine, bólshek saýdamen aınalysatyn keıbir iri bazarlar naryq baǵasymen sanaspaıdy. Osy arada bólshek saýda naryǵynda deldaldar paıda bolyp jatyr. Olardyń paıda bolýy baǵaǵa tikeleı áser etedi. Sol sıaqty, úıdiń janynda ashylǵan azyq-túlik dúkenderi taýarlardy dál osy bólshek saýda bazarlary men qoımalardan alady», - dedi QR Saýda jáne ıntegrasıa mınıstrligi saýda komıteti tóraǵasynyń orynbasary Aıdar Ábildabekov Ortalyq komýnıkasıalar qyzmeti alańynda ótken baspasóz máslıhatynda.
Onyń aıtýynsha, dúken, bazar jáne basqa saýda núktelerinde zańbuzýshylyqty baıqaǵan jaǵdaıda jergilikti atqarýshy organdarǵa júgingen jón.
«Anyqtalǵandaı, elimiz boıynsha keıbir saýda bazarlaryndaǵy orynǵa shekteý qoıylǵan. Odan bólek, bazar basshylary baǵany ózderi belgileıtin jaǵdaı da bar. Iaǵnı, bazar basshylary saýdagerlerge óz talaptaryn júrgizetin kórinedi. Osyǵan oraı iri bólshek saýda bazarlary men qoıma basshylaryna, eger tutynýshylardan shaǵym tússe jospardan tys tekserý júretinin eskertkim keledi», - deıdi ol.