Munaıdyń bir barreliniń quny 200 dollarǵa deıin jetýi múmkin. Bul týraly Energetıka mınıstri Bolat Aqsholaqov aıtty, dep habarlaıdy Almaty-akshamy.kz QazAqparatqa silteme jasap.
Búgin Májiliste tilshiler mınıstrden munaı baǵasy qandaı deńgeıge deıin qymbattaýy múmkin ekenin surady.
«Barlyǵy geosaıası ahýalǵa baılanysty. Bir bareldiń quny 200 dollarǵa deıin jetýi múmkin ekenin joqqa shyǵarýǵa bolmaıdy. Kezinde Reseı Úkimeti tóraǵasynyń orynbasary Aleksandr Novak munaıdyń barreliniń quny 350 dollar bolýy múmkin ekenin aıtqan edi. Bul salada túrli senarıler bar», - dedi B. Aqsholaqov.
Onyń aıtýynsha, qazirgi kezde Qazaqstan 87,5 mln tonna munaı óndiredi, onyń ishinde ishki qajettilik 18 mln tonnany quraıdy.
«Munaıdyń eleýli bóligi eksportqa shyǵady. Sondyqtan munaıdy qymbat baǵaǵa ótkizýden utarymyz anyq», - dedi mınıstr.