Úkim zańdy kúshine engen joq.
"Azyq-túlik korporasıasynyń" eki qyzmetkerine para alǵany úshin 48 mln teńge aıyppul salynyp, sottaldy, dep habarlaıdy Almaty-akshamy.kz Sybaılas jemqorlyqqa qarsy is-qımyl Agenttiginiń málimetine silteme jasap.
Sybaılas jemqorlyqqa qarsy is-qımyl Agenttigi 16 mamyrda taratqan aqparatqa saı, Astana qalasynyń qylmystyq ister jónindegi aýdanaralyq sotynyń úkimimen "Azyq-túlik korporasıasy UK" AQ qarjy departamentiniń dırektory N.G. Jumadilov jáne bas mamany G.J. Ábenov sottaldy. Olar kásipkerden qujattardy jınaý boıynsha buryn kórsetken qyzmetteri úshin, sondaı-aq astyq túrinde taýarlyq nesıe berý týraly shartqa qol qoıýǵa kómekteskeni úshin para aldy dep kúdiktendi.
"Sottalǵandarǵa qatysty sot sheshimimen memlekettik qyzmette jáne kvazımemlekettik sektor sýbektilerinde laýazymdardy atqarý quqyǵynan ómir boıyna aıyra otyryp, jalpy somasy 48 mln teńge aıyppul túrinde jaza taǵaıyndaldy",- delingen habarlamada.
Olar aıyppuldy belgilengen merzimde tólemegen jaǵdaıda jaza bas bostandyǵynan aıyrýǵa aýystyrylatynyn aıtty.