Qazaqstandyqtarǵa Ázirbaıjannyń 25 jetekshi joǵary oqý orny usynylady.
Ázirbaıjannyń joǵary oqý oryndary úkimetaralyq granttar aıasynda qazaqstandyqtarǵa bakalavrıat jáne magıstratýra baǵdarlamalary boıynsha oqýǵa 10 bilim grantyn usyndy, dep habarlaıdy Almaty-akshamy.kz.
«Oqý ázirbaıjan, orys jáne aǵylshyn tilderinde júrgiziledi. Tildi tıisti deńgeıde meńgermegen úmitkerler tegin tildik daıyndyqtan óte alady. Qazaqstandyqtarǵa úkimetaralyq granttar aıasynda bakalavrıat, magıstratýra jáne doktorantýra baǵdarlamalary boıynsha Eýropa men Azıanyń 10 elinde tegin oqýǵa 500-ge jýyq grant jyl saıyn bólinip otyrady. Birqatar el tildi meńgermegen úmitkerlerge tegin tildik daıyndyqtan ótý múmkindigin beredi», - dep atap ótti «Halyqaralyq baǵdarlamalar ortalyǵy» AQ basqarma tóraǵasy Oljas Sákenov.
Atalǵan ortalyq dereginshe, Ázirbaıjannyń joǵary oqý oryndarynda tegin oqýǵa arnalǵan konkýrsqa qatysýǵa qujat qabyldaý 2023 jylǵy 9 maýsymǵa deıin jalǵasady. Ótinimder eGov portaly arqyly, sondaı-aq Halyqaralyq baǵdarlamalar ortalyǵynyń keńsesinde qaǵaz túrinde qabyldanady.
Grant tildik kýrstardan ótý, akademıalyq oqý, jataqhanada turý, medısınalyq saqtandyrý shyǵyndaryn óteıdi. Sonymen qatar stýdentterge aı saıyn stıpendıa tólenedi.
Grant taǵaıyndaý konkýrsyna qatysýǵa negizgi krıterııler:
• bakalavr dárejesin alýǵa úmitkerler úshin - negizgi orta bilim týraly atestat nemese kýálik jáne aǵymdaǵy oqý jylyndaǵy aǵymdaǵy úlgerimi týraly tabel/transkrıpt nemese arnaýly orta bilim týraly dıplom ortasha balynyń keminde 4,0 (5,0-ten)balyna sáıkestigi;
• magıstr dárejesin alýǵa úmitkerler úshin - bakalavr/maman dıplom nemese aǵymdaǵy úlgerimi týraly transkrıpt ortasha balynyń keminde 3,0 (4,0/4,33-ten) balǵa sáıkestigi;
• aǵylshyn tilinde oqý úshin keminde mynadaı deńgeıdegi qoldanystaǵy sertıfıkat kerek:
• «Bakalavrıat» baǵdarlamasy úshin – IELTS 9.0-dan 5.0; TOEFL 120-dan 40; «Magıstratýra» baǵdarlamasy úshin – IELTS 9.0 - 9.0-dan 5.5; TOEFL 120-dan 50.