Jambyl atyndaǵy fılarmonıada Ázirbaıjan áýenderiniń keshi ótti
Merekelik is-sharada baýyrlas eldiń halyq ánderi oryndaldy, dep habarlaıdy Almaty-akshamy.kz
Sondaı-aq kesh barysynda keńestik jáne zamanaýı kompozıtorlardyń shyǵarmalary oryndalyp, ónersúıer qaýymdy ózgeshe kúıge bóledi.
Aıta ketý kerek, eki eldiń ortaq tarıhy sonaý túrki zamanynan bastaý alady. Al Kavkazdyń ońtústik-shyǵysynda ornalasqan ázirbaıjan halqy bıyl Táýelsizdiginiń 30 jyldyǵyn atap ótýde.
«Búgin ázirbaıjan-qazaq mádenıetin, olardyń mýzykasyn kórsetkimiz keledi. Táýelsizdigimizdi atap ótýge jaǵdaı jasaǵan Qazaqstannyń Mádenıet mınıstrligine alǵysymdy bildiremin. Biz úshin bul úlken jetistik», – dedi Qazaqstandaǵy Ázirbaıjandar qaýymdastyǵynyń basqarma múshesi Garıp Mamedov.
Fılarmonıanyń kórkin keltirgen keshte Oljas Súleımenov te boı kórsetti. Konsert barysynda bıyl óziniń 85 jyldyq mereıtoıyn atap ótetin halyq jazýshysyna arnalǵan týyndynyń da tusaýy kesildi. Al qazaq aqynynyń tulǵasy men shyǵarmashylyǵyna arnalǵan «Reverie Rewire» eńbeginiń avtory, kompozıtor Leıla Romanova is-sharaǵa qatysý úshin arnaıy Almatyǵa kelipti.
«Baǵdarlama biz úshin erekshe, sebebi búgin ázirbaıjan kompozıtorlarynyń týyndylaryn oryndaımyz. Mýzyka arqyly jańa mádenıetpen tanysqan unaıdy. Kórermender konsertten lázzat alady degen oıdamyn», – dedi QR Halyq ártisi Gaýhar Mýrazbekova.