Almatyda Qazaqstan Respýblıkasy Konstıtýsıasynyń 30 jyldyǵyna oraı «Tıimdi Parlament: azamattardyń konstıtýsıalyq quqyqtary» atty «dóńgelek ústel» ótti.
İs-sharany Almaty qalasynyń Qoǵamdyq damý basqarmasy uıymdastyrdy. Talqylaýǵa qalalyq máslıhat depýtattary, zańgerler, tarıhshylar, oqytýshylar, sarapshylar jáne qalanyń belsendi jastary qatysty.
Atalmysh jıyndy Qoǵamdyq damý basqarmasynyń basshysy Aıdar Esenbekov ashyp, júrgizip otyrdy. Aldymen alqaly jıynǵa qatysýshylardy Ata Zańnyń mereıli belesimen quttyqtaǵan spıker kúshti jáne ádil memleket qurýdaǵy Konstıtýsıanyń mańyzdylyǵyn atap ótti.
"Konstıtýsıa – bizdiń táýelsizdigimizdiń irgetasy, árbir azamattyń quqyqtary men bostandyqtarynyń qaınar kózi. Osydan dál 30 jyl buryn biz demokratıalyq, quqyqtyq jáne zaıyrly memlekettiń paıdasyna tańdaý jasadyq. Búgingi tańda osy joldy jalǵastyra otyryp, konstıtýsıalyq normalarǵa qurmetpen qaraý, quqyqtyq mádenıetti qalyptastyrý jáne jaýapty urpaqty tárbıeleý mańyzdy", – dep atap ótti ol.
"Konstıtýsıa tek quqyqtyq júıeni ǵana emes, halyqtyń tarıhı jolyn da kórsetedi. Biz Qazaqstannyń beıbitshilik, ádildik jáne birlik qundylyqtaryna súıene otyryp, óziniń memlekettiligin qalaı quraıtynyn kóremiz. Bul proseste Parlament aǵartýshylyq jáne biriktirýshi ról atqarady, ásirese jastardyń bul baılanysty bilýi óte mańyzdy", – dep atap ótti Tarıh ǵylymdarynyń kandıdaty, Tarıh jáne etnologıa ınstıtýtynyń etnologıa jáne antropologıa bóliminiń meńgerýshisi Aqsuńqar Abdýlına.
Etnosaralyq kelisimniń qundylyǵyna profesor, Halyqaralyq aqparattandyrý akademıasynyń akademıgi, Jobalardy basqarý ınstıtýtynyń (Project Management Institute) múshesi Alekseı Sehov erekshe nazar aýdardy. Ol óz sózinde Konstıtýsıa kópultty qoǵamdaǵy birliktiń basty quraly ekenin atap ótti.
"Qazaqstanda 130-dan astam etnos turady jáne olardyń beıbit qatar ómir súrýine Konstıtýsıa quqyqtyq negiz bolyp tabylady. Biz tilimiz, mádenıetimiz, dástúrlerimiz boıynsha erekshelenemiz, biraq ortaq tarıh pen bolashaqpen baılanysty halyq retinde birgemiz. Parlament bul tepe-teńdikti saqtaýda, barlyǵynyń quqyqtary men bostandyqtaryn qamtamasyz etýde sheshýshi ról atqarady", - dedi ol
"Dóńgelek ústel" qorytyndysy boıynsha quqyqtyq aǵartýǵa, bılik organdary men halyq arasyndaǵy dıalogqa, sondaı-aq jastardy zańnamalyq jáne qoǵamdyq bastamalarǵa tartýǵa qatysty usynystar ázirlendi.